Kunngikkormiumit peqataaffigineqartumik Nuummi viinninik ussiineq
Prins Henriup viinniutini Chateau de Cayximeersut oqaaseqarfiginiarpai.
Club Vinomi ilaasortat, Pilersuisup vinklubbiani, franskit viinniutaannik ilisimasaqalernissamut nalissaqanngitsumik periarfissinneqassapput, tassa viinninik ilisimasaqarluartumit, tassa prins Henrimmit.
Kalaallit Nunaata juunip 21-ani Inuiattut Ullorsiornerani kunngikkormiut tikeraarnissaannut atatillugu dronningip uiatalu Frankrigimi illussaarsuarminnit viinniliorfiutigisumit Cahorsimiittumi Chateau de Cayximeersunik viinnik arlalinnik pitsaasunik Club Vino sassaalliiniarpoq.
Nuutoqqamiittumi Restaurant Nipisami viinninik ussiisaqattaarnermi Kunngikkormiutut Ataqqinassusilik prinsgemal peqataassaaq viinnillu usserneqartut oqaaseqarfigisassallugit.
Viinninik ussiisaqattaarnermi viinnit aappalaartut Chateau de Cayximeersut ukiuni arlalikkaartuneersut usserneqassapput.
Club Vinop viinnit pillugit allaaserisartuata Jacqueline Jensenip viinninik ussiisaqattaarneq ingerlatissavaa aamma viinnissaqarfik Cahors naatsumik ilisaritinniarpaa.