Nuup Kangerluani kigutilissuaq

Arfininngornermi juunip 6-ianni 2009 Lars Rosingip, MR Charter-imeersup, Nuup Kangerluani kigutilissuaq assilivaa. Kigutilissuaq arfeq itisoormiuuvoq qaqutiguinnaq sinerissamut pisartoq, taamatut allappoq natur.gl.

Kigutilissuit Ækvatorimi imaani itisuuni nunarsuullu avannarpasissuani kujasissuanilu sikuni katinngasuni naammattuugassaasarput. Arnavissat piarallit nunarsuup kiannersaani kiannersaallu tulliani imaani ataatsimoortuniittarput, angutivissallu immat nillernerit ornittarpaat angisoorsuanngorniarlutik neriniarlutik. Angut annerpaat ilaanneeriarlutik kiattunukartarput nuliuartorlutik.

Kigutilissuit tamarmik immikkut ilisarnaateqarput sarpimmik killingatigut. Kigutilissuit Atlantikumiittut sarpiinut nalunaarsuiffeqarpoq, tamakkualu pingaartumik naammattoorneqartarput Norgemi, Akullersuarmi, Azorerne-mi, De Kanariske Øer-mi, Den Mexicanske Gulfimi aamma Caribiami.

Kigutilissuit sunik tamanik nerisaqartuupput, ammassassuarniit eqalussuartut amikorujussuarnullu, nerisaalli nalinginnaanerpaat tassaapput amikut akunnattumik angissusillit aalisakkallu, assersuutigalugu nipisaat suluppaakkallu.

KIgutilissuit Nuup eqqaani naammattuugassaanerusarput, kangerlunnilu aamma takuneqakulasarsimallutik. Tamatuma saniatigut nalinginnaasuupput niisat tikaagulliillu, takunissaat ajornakusoorsinnaagaluartoq.