Isumaginninnermi Naammagittaalliuuteqartarfik suliassanik ulikkaarpoq
Isumaginninnermi Naammagittaalliuuteqartarfimmut suliakkissuutigineqarsimasut suliarineqarnissaannut ukiuni marlunnik utaqqisoqassaaq.
Tamatumunnga pissutaavoq kommunini tamakkuninnga suliaqartartut ilinniarsimanerisa nammannginnerat, naammagittaalliuteqartarfiup siulittaasua Naja Joelsen taamatut isumaqarpoq. Taamak allappoq knr.gl.
Maannakkorpiaq suliassat 600 naammagittaalliuteqartarfiup aalajangiinissaanik utaqqisinneqarput, tassanilu sulisut amerlanngillat.
- Malugisinnaasarput tunngavigalugu ajornartorsiut annerpaaq kommuniniippo, tassa tamakkuninnga suliallit amerlanertigut pikkorissarsimanerit amigaatigimmatigit, isumaginninnermut inatsisinik paasinninneq kisalu ilisimasaqarfigerpiartarnagu, aalajangiineq qanoq allaaserineqassanersoq. Innuttaasoq tunngavilersorneqanngitsumik imaluunniit inatsimut innersuussinertaqanngitsumik itigartinneqaruni, taava pineqartoq misigisimassaaq naammaginnanngitsumik ilitsersuunneqarsimalluni. Kiisalu tamanna naammagittaaliutinik amerlanernik pilersitsissaaq, Naja Joelsen oqarpoq.
Maluginiaqquvaa naammagittaalliutinut tunngasut suliarineqartarnerat inuiaqatigiinnut annertuumik aningaasartuutaammata.