Minik Rosing Amalienborgprisimik nersornaatisivoq
Ujarassiornermi professori Minik Rosing aamma Niels Bohr Institutimi professori Dorthe Dahl-Jensen ilisimatusarnertik pissutigalugu tamarmik 100.000 koruuninik aningaasartalimmik Amalienborgprisimik nersornaatisipput.
Dronning Margrethes og Prins Henriks Fond ullumi nal. 11.45 Amalienborgimi Christian IX´s Palæ-mi, nersornaasiuttagaq Amalienborgprisen Minik Rosingimut, prof., lic. scient., Statens Naturhistoriske Museum, Geologisk Museum, Københavns Universitet aamma Sorthe Dahl-Jensenimut, Niels Bohr Instituttet, København Universitet, tunniuppai, taamatut allappoq kongehuset.dk.
Dronning Margrethes og Prins Henriks Fondimi siulersuisut Nunat Tamalaat Ukiuannut 2007-2009-mut atatillugu aalajangersimapput Amalienborgprisen professorinut nuimasuunut marlunnut tunniunneqassasoq, taakkualu Kalaallit Nunaanni ilisimatusarnerminnut tamarmik 100.000 koruuninik aningaasartalinnik nersornaaserneqarput.
Minik Thorleif Rosingip Kitaani nunarsuarmi ujaqqat pisoqaanersaannik ilisimatusarnermigut nunarsuarmi siusissukkut uumassuseqarneq nunarsuullu pilersimanera ilisimatusarfigisimavai.
Dorthe Dahl-Jensen suliniummi NEEM-projektimi (North Greenland Eemian Ice Drilliing) pisortaavoq, taannalu 2011-p tungaanut Nunatta kitaata avannaarsuata sermersuani 3000 meterinik itissusilimmut qillerissaaq, ukiut 130.000-ingajaat angullugit silap pissusiata allanngorarnera paasiniaaffiginiarlugu.
Kunngikkut Amalienborgprisen AMALIENBORGMEDALJEN, professor Mogens Bøggildimit 1983-imi pilersinneqarsimasoq, ilanngullugu tunniuppaat.
Dronning Margrethep og Prins Henriks Fond 1972-imi aalajangerpoq Amalienborgprisen pilersinniarlugu, ilisimatuussutsikkut qaffasissumik ilisimatusarneq kajumissaarniarlugu tapersersorniarlugulu, pingaartumik isumaginninnikkut inuiaqatigiinnilu suliniutitigut imaluunniit qallunaat inuppalaartut qallunaanut nalinginnaasumik soqutiginartunik atuakkiortarnerannut. Nersornaat ilaanniinnakkut tunniunneqartarpoq, kingullermik 2005-imi tunniunneqarsimalluni.