Kalaallini siullersaalluni psykodramaterapeutinngortoq

Jakobine Leanderip Ilulissaneersup Dansk Center for Psykodramamiit integreret psykodramaterapeutitut sooraarummeernini angusiffigaa.

Jakobine Leander kalaallini siullersaalluni Integreret psykodramaterapeutitut ilinniartitaaneq naammassivaa. Asseq: Dansk Center for Psykodrama

Jakobine Leanderip ilinniartitaaneq ukiunik pingasunik sivisussusilik juuni aallartinnerani naammassivaa.

Psykodrama tassaavoq tarnikkut ajoquteqartunik katsorsaariaaseq professor J. L. Morenomit ineriartortinneqarsimasoq. Psykodrama isumaqarpoq "tarneq iliuuseqartillugu" kiisalu Integreret prsykodramami katsorsaanermi atorneqartarput isumassarsiornikkut aamma siunertaqarluartumik ajornartorsiutit siornatigut pisimasut aamma maannakkut pisut qaangerniartinneri.

Katsorsaanerup ilaa pingaarutilik tassaavoq siunissamut sammisumik siunertaqarluartumik iliuusissanik pilersaarusiorneq.

– Jakobine Leander Kalaallit Nunaanni suliffeqarnermut annertuumik ilisimasaqarpoq, siusinnerusukkullu Kalaallit Nunaanni suliffissarsiussisarfinni sulisarsimalluni kiisalu suliffissaqartitiniarnermut iluarsaasseqqinneq peqataaffigisimallugu. Unammilligassarpassuarnut assigiinngitsunut piareersimaniarluni ilaatigut Kalaallit Nunaanni aqqutissiuisutut ilinniagaq aamma ataqqiqatigiilluni oqaloqatigiissitsisartutut ilinniagaq naammasisimallugu, taamatut nalunaarput Dansk Center for Psykodrama.

– Maannakkut ingerlappaa Danmarkimi DAC-ip atornerluisunik katsoorsaasutut ilinniartitaaneq ingerlataa kiisalu ilinniakkani naammassiguniuk Kalaallit Nunaannut uteqqinniarpoq, neriuutigalugu inuiaqatigiit nammineq piginnaasani atorsinnaajumaaraat. Jakobine Leander kalaallini siullersaalluni Integreret psykodramaterapeutitut allagartartaarpoq, Dansk Center for Psykodrama nalunaarpoq.

Powered by Labrador CMS