Greenpeacep umiarsuaa nunatsinnut
Umiarsuup "Arctic Sunrise"-p qaammatini marlunni Kalaallit Nunaat kaajallallugu ilisimatusarluni angalanissani taasinngorpat aallartissavaa. Ilisimasassarsiornikkut silap pissusiata allanngoriartornera uppernarsarneqassaaq.
Greenpeacep umiarsuaq sikusiuut "Arctic Sunrise" Kalaallit Nunaanni angalatissavaa Kalaallit Nunaanni silap pissusianut allanngoriartupiloortumut uppernarsaatissanik aarlerinartunik misissuiniarluni uppernarsaatissarsiniarlunilu.
Aamma umiarsuarmut ilaassapput tusagassiortut, ilaatigut Kinameersut, tamakkualu decembarimi Københavnimi silap pissusia pillugu ataatsimeersuarnissaq, COP15, sioqqullugu nunaminnut nalunaarusiortassapput, generalsekretær Mads Flarup Christensen sermitsiaq.gl-imut paasissutissiivoq.
Angalanermi Greenpeace aatsaat taamak avannarpartigissaaq.
Ataasinngorpat juunip 22-ianni Arctic Sunrise Nuummut tikissaaq, ilaatigullu inatsisartut siulittaasuata Josef Motzfeldtip umiarsuaq pulaassavaa.
Juulip 3-anniit aggustip 8-annut ilisimatuut Nunatta Avannaani Peterman-ip sermianiissapput, pilersaarutit malillugit uppernarsarniassallugu sermip aakkiartornerata sukkassusia aammalu sikutarujussuup Manhattenitut atsigisup Sermimit kaanngarartarsinnaanera uppernarsaatissarsiniarlugu.
Angalanermi ornitassat allat tassaapput Tunumi iigartartorujussuit, "Arctic Sunrise" tappavaniissalluni aggustip 20-ianniit aggustip 25-iannut. Kalaallit Nunaanneereeruni umiarsuaq Svalbardiliassaaq taassumalu avannaani ishavet-iliassalluni, pilersaarutillu malillugit umiarsuaq tassunga pissaaq septembarip 10-anni.