Royal Greenland: Uippallertoqartariaqanngilaq!

- Royal Greenland nakkaattuulinngilaq, pisortaq Flemming Knudsen oqarpoq.

Atassutip paragraf 36 atorlugu apeqqutit arlallit Royal Greenlandip aningaasaqarniarnera tunngasuteqartut naalakkersuisunngortussanut apeqqutigai. Apeqqutinut tunngavilersuutimini Atassut allappoq Royal Greenland aningaasaqarniarnermigut ajorluinnartumik inissisimasoq, kiisalu landskarsi ikiorsiinngippat suliffeqarfissuaq akiliisinnaajunnaarluni uneriaannaasoq. Taamaattoqarnera pisortap Flemming Knudsenip ilisarinngilluinnarpaa, knr.gl allappoq.

- Tamanna uagut akerlilerusupparput. Soorunalimi aningaasarsiornikkut ajornartoornerup kiisalu pisisartut piumanninnerisa apparnerata ajornartinnerulaarpaa, kisianni uanga pisut taamaannerat, tusagassiutittigut nalunaaruteqarnikkut oqaatigineqarsimannguatsiartut ilisarisinnaanngilakka, Flemming Knudsen oqarpoq.

Nassuiaatigaa Royal Greenland suliffeqarfittut aallartikkamili aningaasanik akiitsugaqartuarsimasoq, ilaatigut illutitigut attartukkar kingorngunneqarsimanerat pissutigalugu. Taamaattumik Royal Greenland aningaasaateqarnerminut naleqqiullugu piffissaq tamaat aningaasatigut akiitsuni ilungersuutigiuarsimavai, pisortaq nassuiaavoq.

- Tamanna kingullermik ukiumoortumik naatsorsuutini erseqqissaatigaarput, taamaattumillu Namminersornerullutik Oqartussat suleqatigiissitaliorput suliffeqarfiup siunissami aningaasaqarnermigut inissisimanissaanik misissuisussamik. Suleqatigiissitaq naammassereerpoq kiisalu naatsorsuutigineqarpoq taakku nalunaarusiaat qinersisoqareermat inatsisartunut nutaanut aamma naalakkersuisunut nutaanut saqqumiunneqarnissaa, Flemming Knudsen oqarpoq, oqaluttuarisinnaanngilaalu nalunaarusiami qanoq allassimasoqarnersoq.

Pisortap nammineq Royal Greenlandip aningaasaqarnermigut inissisimanera nassuiassaguniuk, taanna imaappoq.

- Tassa ”business as usual” (suliffeqarfik taamaaginnarpoq) niuerfimmi pisarnermisut ajornakusoornerulaaginnartumi, Flemming Knudsen oqarpoq. Tamatuma saniatigut ilannguppaa, Royal Greenland ataasiaannarluni Namminersornerullutik Oqartussanit aningaasanik tigoriaannarnik pissarsisimasoq, tassalu 2000-imi 200 millioninik pissasigami. Ukioq taanna suliffeqarfiup aningasat atukkiunneqarsimasut 240 millioninngorlugit utertippai.

Powered by Labrador CMS