Mary Nuummi qimarnguimmut pulaarpoq

Kronprinsesse Mary, Mary Fondenimut siulittaasutut ataatsimeeqattaarnerit aamma workshopsit ingerlateqqippai arfininngormallu ullaatungaa Nuummi qimarnguimmut pulaarpoq.

Kronprinsesse Mary Nuummi qimarnguimmut arfininngormat ullaatungaani pulaarpoq. Assiliisoq: . Leiff Josefsen

Kronprinsesse Mary qimarnguimmut ingiallortini peqatigalugit takkummat Ivalu Poulsenimit naasunik qilertanik tikilluaqquneqarpoq, tikilluaqquseqataapput viceborgmester Astrid Fleischer Rex aamma qimarnguiup ningiua, Dora Kleist.

Kunngissap nulia nalunaaquttap akunnera ataaseq qimarnguimmiippoq, tassani oqaluttuuneqarpoq qimarnguimmi najugaqarluni qanoq innersoq kiisalu arnat persuttarneqarsimasut taakkulu meeraasa inuunertik ingerlaqqissappat unamilligassaat qanoq oqimaatsiginersut.

- Tassa tamanna tassaavoq uannut atuinerpaaq. Tassa ingerlaqqissagaanni tamatuma qanoq artornartiginera, Kronprinsesse Mary pulaarnermi kingorna oqarpoq:

Kronprinsesse Mary erseqqissaavoq Mary Fondenimi neriuutigalugu pitsaasumik kinguneqarluartumik suleqatigiinnermik pilersitsisinnaallutik kiisalu siunissamut tunngavissiumaarlutik, maannakkut Kalaallit Nunaanni ingerlanneqareersut iliuutsit pitsaasut tapersersornissaannut arnanik persuttarneqartartunik ikiuinermut tunngatillugu.

- Mary Fondenip siunniussaasa ilagaat angerlarsimaffinni persuttaasarnerup iliuuseqarfiginissaa kiisalu Kalaallit Nunaat suliaqarfissatta ilagivaat.

- Ippassaq kommunemi aamma naalakkersuisunut pulaarnitsinni paasitinneqarpugut, maannakkut iliuutsinik pitsaasunik aallartitsoqareersimasoq Kalaallit Nunaanni arnat persuttarneqartartut ikiorniarlugit. Arnat persuttarneqartartut uagut inuiaqatigiit akornatsinni matusimasorujussuupput, uagullu peqataarusuppugut allanngortitsinissamut taakku ataqatigiinnermut inuunermullu pitsaasumut utertikkusullutigit, kunngissap nulia oqarpoq.

Mary Fondenip angerlarsimaffinni persuttaasarnermut tunngatillugu siunertaa juunimi 2008-mi saqqummiunneqartoq, tassaavoq:

- angerlarsimaffimmi persuttaasarnerup oqallisigineqarnissaanik pilersitsinissaq peqataanissarlu, taamaalilluni tamanna ilaqutaariit pineqartut kisimiillutik ajornartorsiutigissanngimmassuk, kisianni akerliani tamatta susassaqarfipput

- naqissuserniarlugu persuttaanerup akuerineqarsinnaanngilluinnarnera, kiisalu persuttaaneq qaqugukkulluunniit pissusissamisoortutut isigineqarsinnaanngitsoq

- persuttaasarnerup ningalittut ingerlasarneranik kiisalu tamatuma inuunerup ingerlanerani sunniuteqartarnerani paasinnititsinissaq - meeraanermiit inuutunngornermut kiisalu inersimasutut inuunermut

- arnat aamma meeqqat, ulluinnarni annertoorsuarmik taartuinnarsuarmillu isertugaqartut, angerlarsimaffimmimi persuuttaasarneq taamaammat, oqarsinnaasunngortikkusullugit kiisalu periarfissikkusullugit persuttaanertaqanngitsumik aamma inunnut allanut akulerussinnaajunnaarneranniit qimagutsikkusullugit.

Mary Fondenip novembarimi 2008-mi angerlarsimaffinni persuttaasarneq pillugu isumasioqatigiisitsipput kiisalu 2009-mi peeqqanik persuttaasarnerup annertunerusumik eqqumaffigineqalernissaanik suliniuteqarniarpoq.

Ullumi kingusinnerusukkut kunngissakkut orniguttarfik Mælkebøtten kiisalu Qoorngumi meeqqat angerlarsimaffiat pulaassavaat.

Powered by Labrador CMS