Takanna, Namminersornermillu pilluaritsi
Sapaatiummat ullatungaani Dronning Margrethep inatsit, Kalaallit Nunaannut namminersortumut tunngaviusussaq, Inatsisartut siulittaasuannut Josef Motzfeldtimut tunniuppaa.
Dronningikkut ilaqutariillu kunngikkormiut sinneri utaqqisitsingaatsiarput, taamaattumillu namminersornermut inatsisip tunniunneqarnera minutsinik 40-nik kinguartoorpoq. Dronningip inatsisartut siulittaasuata Josef Motzfeldtip allaffianeeqqaartussaasimavoq Inatsisartut tikeraanut allattaaviannut atsiussalluni.
Sialualaalaariarluni ullormut naleqqulluartumik seqinnilersimavoq. Allaanngilaq namminersornerunitoqaq kuugunneqartoq, namminersornermut nutaamut inissaqartitsiniarluni.
ASSIT TAKUKKIT: Assit namminersornermut inatsisip tunniunneqarneranit.
Inatsisartut ataatsimiittarfianni inatsisartunut ilaasortat kalaallisoorlutik inatsisip tunniunneqarnissaanik utaqqipput. Inatsisip tunniunneqarnera sioqqutitsiarlugu inatsisartut siulittaasuat Josef Motzfeldt inatsisartut oqaluttuarfiannit naatsumik oqalugiarpoq, ilaatigut oqarluni:
- Ullumi ulloq oqaluttuarisaanerup aallartinneratut ippoq. Piffiit nutaat tamatta sulinissatsinnik pisariaqartitsipput, arnat angutillu, inuusuttut inersimasullu. Kisimiilluta naammassisinnaanngisavut ataatsimoorluta naammassisinnaasariaqarpavut. Anorersualissaaq, qaqiniagassaqassaqaagut ilaanneeriarlutalu nakkakannajaarsinnaasassalluta...
- Nunarsuarmioqatigiittut nunarsuatta siunissaa pitsaanerusoq anguniarusupparput. Piffiup atukkatta ataqatigiinnerunissatsinnik piumaffigaatigut, aaqqiagiinnginneq pinnagu. Siunissaq periarfissarpassuaqarpoq. Periarfissanik pissarsinissatsinnut apeqqutaaginnarpoq niaqorsorsinnaassuserput, qunusuissuserput angusaqarusussuserpullu.
Inatsimmik tunniussineq naatsumik ingerlanneqarpoq, dronningip Margrethe inatsit tigummillugu inatsisartut siulittaasuata savaniilluni, taassuma inatsit oqaluttuarisaanermut pingaarutilik illua'tungaatigut tigullugu. Taamatut imminnut saallutik nikorfapput, dronning Margrethep tunniussinermi naatsumik oqalugiarnerani.
Ministeriunerup Lars Løkke Rasmussenip pisoq oqaluttuarisaanermut pingaarutilittut taavaa.
- Ataatsimoorluta oqaluttuarisaliorpugut. Ulloq kiffaanngissutsip ulloraa. Inuiaat kalaallit akisussaassutsimik tigusipput - akisussaassutsimik kalaallit sorlaannut kalaallillu kulturiannut ilumoortuulluni kivitassamik.
Ministeriunerup Folketingip qallunaallu naalakkersuisuisa tunissutaat tunniuppaa, taannalu tassaavoq sølvimik matusartuliaq kanngussammik Christiansborgip qalianeersumik ukiunik 70-inik pisoqaassusilimmik matuani pinnersaatilimmik.
Persuarsiorneq naggataarlugu inatsisartut siulittaasuata Josef Motzfeldtip Namminersorneq pingasoriarlugu hurraarutigitippaa.
ATUARUK: Josef MotzfeldtIp oqalugiaataa.
AtUARUK: MInisteriunerup Lars Løkke Rasmussenip oqalugiaataa