Imarsiortut marluk ajunaarnerat misissorneqarpoq
Umiarsuarmi uuliamik pajuttaammi Orasilami Svendborgimeersumi sillimaniarneq Søfartstyrelsimit isornartorsiorneqarpoq. Umiarsuaatileqatigiiffik issittup imartaani imaatigut angalanerup navianartuuneranik paasinnissimanngilaq.
Imaatigut angallannermik nakkutiginnittut ajutoortoqarsimatillugu misissuisartuisa (Søfartstyrelsens Opklaringsenhed) umiarsuaatileqatigiiffik Rederiet M.H. Simonsen, Svendborgimeersoq isornartorsiorpaa Kalaallit Nunaanni 16. januaari ukioq manna ajunaartoqarnerata kingorna, Fyens Amts Avis nittartakkamini faa.dk-mi allappoq.
Aquttoq 47-nik ukiulik aamma skibsassistenti sungiussisimanngitsoq umiatsiaq sulinermut atortagartik kinngummat ajunaarput. Saarlumi innaallagissiorfiup eqqaaniitunut uuliaasivinnut slangi umiarsuarmiit ikaarunniartillugu umiatsiaat kinnguvoq.
Ajutoortoqarsimatillugu misissuisartut paasivaat umiatsiap pineqartup sananeqarnera allanngortinneqarsimasoq. Aquuteralalerneqarsimavoq taamaattumillu qilannguusalerneqarsimalluni. Slangi qilannguusaata qaavaata tungaanut qajannaarneqarsimavoq. Tamatumalu kingunerisimavaa umitsiap artorsartinneqarnera, tamannalu kingujaatsuuneranut ajortumik sunniuteqarsimavoq.
Kinngunermut aammattaaq pissutaaqataasinnaavoq slangip usingiaanermut atorneqartartup tasisuanera, taassumammi siatsinneqarnerata unitsinneqarnerata kungunerisinnaavaa sakkortuumik tunummut nusutsinneq.
Ajutoortoqarsimatillugu misissuisartut isumaqarput inuttat umiatsiamiittut aamma umiarsuarmiittut imminnut attaveqaqatigiinnerat amigarsimasoq, tassa imiarsiortut marluk ilisimavissimanngilaat ikkussinissaq tulliuttoq qaqugorpiaq pissanersoq.
Inerniliussaq tassaavoq, umiarsuarmi aqutsisut naammaginartuunngitsumik paasisimagaat, issittumi umiatsiat sulinermut atatillugu atortut atorlugit imaatigut angalanerup navianartoqarsinnaanera. Taamatuttaarlu umiarsuarmi aquttut aamma Svendborgimi umiarsuaatileqatigiiffiup akornanni sillimaniarnermut atortunik pisisoqarnissaanut tunngatillugu attaveqaqatigiinneq naammaginarsimanngilaq.