KIK-mi suli tukattoqarpoq
Ilinniartut kattuffianni siulittaasoq Didda Isaksen Petersen suli Nuummiissimanngilaq peqatigiiffimmi aningaasatigut tukattoqarnera iluarsiartorniarlugu.
Ukiuni kingullerni tallimani KIK assorsuaq tusarsaanngissimavoq, ilaasortat amerlasoorpassuit annaaneqarsimapput kiisalu aningaasaqarnermut tunngatillugu ammuinnaq ingerlasoqarsimalluni. Marsimi KIK siulittaasuatut qinigaaqqammersup Didda I. Petersenip neriorsuutigaa poorskinngitsiarnerani Nuummut tikinniarluni tamatumani siunertaralugu peqatigiiffiup allaffeqarfimmik ingerlatsisua peqatigalugu peqatigiiffiup aningaasaqarniarnerata qulaajarneqarnissaa, ukiummi tallimat kingulliit tamanna paatsiveqanngivissorsimammat.
KIK-p siulittaasua Ilulissani isumaginnittunngorniarluni ilinniagaqartoq, Nuummiittussaasimagaluarpoq Ilinniagaqarnersiuteqartitsiviup ataatsimeeqatigineqarnissaanut atatillugu, kisianni silap ajornera pissutigalugu apuutinngitsoorsimavoq.
Didda I Petersen oqaluttuarpoq siulersuisut qaammammut marloriarlutik oqarasuaatikkut ataatsimiittartut. Tulliani ataatsimiinnermi ilaatigut eqqartorneqassapput peqatigiiffiup qanoq ililluni ilaasortani amerlinerutissinnaanerai, ullummikkut 400 missaannik amerlassuseqarput.
Aningaasaqarniarnermi qanoq iliuuseqarfiniarpisiut?
Akuttunngitsumik qanoq iliussanerluta oqaluuserisarparput, kisianni iluarsiissutissamik suli nassaanngilavut, Didda I. Petersen oqarpoq.
KIK ullumikkut 130.000 koruuninik akiitsoqarpoq, taakku ingerlaavartumik akilersorneqarput namminerisamik aningaasaataanni 100.000 koruunik amigartoorutigineqarput.
Sermitsiaq normu 17... atuaruk