Skip to main content

Ilageeqarneq pillugu inatsit kinguaattoorpoq

Maannakkut peqqussummit atuuttumit soqanngitsumut ikaarsaariassaagut, biskop Sofie Petersen pakatsisimaqisoq oqarpoq.

Qaammatit marluunngitsulluunniit qaangiuppata Kalaallit Nunaat Danmarkimiit avissaassaaq. Kisianni ilagiit kalaallit 21. juuni nalliuttorsioqataalerunik taava tamanna pissaaq, ilagiit qanoq ingerlanissaat pillugu sunnguamilluunniit inatsiseqanngitsoq, Kristeligt Dagblad allappoq.

Ilagiinnut ilaasortaanermut inatsiseqanngilaq, ilagiit aningaasatigut qanoq inissisimassanersut nalilersorneqanngilaq aamma biskopip provstinut aamma palasinut qanoq sunniuteqassanersoq pillugu inatsiseqanngilaq. Tamanna Kalaallit Nunaanni biskopip Sofie Petersenip pakatsisimassutigaa.

- Maannakkut peqqussummit atuuttumit soqanngitsumut ikaarsaariassaagut. Uangalu assorsuaq kissaatigigaluarpara killiliussat iluarsereerneqarsimanissaat, oqarpoq.

Sofie Petersenip arlaleriarluni naalakkersuisut siulittaasuat Hans Enoksen attaveqarfiginiartarsimagaluarpaa ilagiit namminiilivinnermi qanoq pineqarnissaat pillugu, kisianni tamanna iluatsissimanngilaa.

- Ilisimatinneqarsinnaanngilangaluunniit uagut ilagiittut suminngaannit namminiilivissanersugut. Danskit nalagaaffianniit imaluunniit Naalakkersuisuniit?

Provst Erik Balslev-Clausen, ukiut 30-t sinnerlugu Kalaallit Nunaanni ilagiinnik sammisaqarsimasup tamanna sianiilliulaarnertut aamma ajuusaarnartutut taavaa.

Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik malillugu maannakkut kalaallit peqqussutaat avissaarnerup kingorna ingerlaannassaaq. Taamaassaarlu inatsisartut nutaat, 2. juuni qinerneqartussat ilagiinnut tunngatillugu inatsisissamut anngunnissaat tikitserlugu.

Ilagiit aaqqissuussaanerat pillugu inatsisissaq 2008-mi ukiaaneersoq pigineqarpoq, tassani ilaatigut biskopip oqartussaanera malunnaatilimmik annertusineqarpoq. Kiisalu ilagiit aammattaaq nammineernerulissapput.

Kisianni inatsisissatut siunnersuut, ilageeqarneq pillugu eqqarsartitani ukiuni arfineq marlunni oqallissimanermik tunngaveqartoq, taannaassanersoq ilagiit pillugit aaqqissuusinermut tunngaviussasoq, imaluunniit inatsisartut nutaat aallaqqaataaniit aallartinniarnersut, ilisimaneqanngilaq.

Erik Balslev-Clausen kakkaginninngilaq, naak siunnersuut pitsaasunik arlalinnik iliuusissanik ilaqaraluartoq.

- Kisianni Namminersornerusut avataaniit ikiorneqarusunngillat kiisalu ilagiit qanoq ingerlanneqarnerannut tunngatillugu immikkut ilisimasalinnik peqarnatik, Kristeligt Dagbladimut oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER