Nakorsaatissat naammapput
Nualluutip puulukineersup siammariartornera peqqinnissaqarfiup peqqinnissamillu nakkutilliisoqarfiup malinnaaffigeqqissaarpaat. Nappaat Kalaallit Nunaannut siammaatissagaluarpat akiornissaanut naammattunik nakorsaatissaqarpoq, peqqinnissaqarfimmik nakkutilliisoq oqarpoq.
Nuna tamakkerlugu nakorsaatateqarfik nakorsaammik Tamiflu-mik, nualluummik nutaamik, puulukit nualluutaannik, katsorsaasinnaasumik naammattumik peqqumaataateqarpoq. Taamatut paasissutissiivoq peqqinnissaqarfimmik nakkutilliisoq Flemming Stenz.
Nualluut taanna manna tikillugu Kalaallit Nunaanni Danmarkimiluunniit naammattoorneqarsimanngilaq, peqqinnissaqarfiulli peqqinnissaqarfimmillu nakkutilliisoqarfiup nunarsuarmi tamarmi taassuma siammaakkiartornera malinnaaffigeqqissaarpaat, peqqinnissaqarfimmik nakkutilliisoq sermitsiaq.gl-imut oqarpoq.
Nunatsinni napparsimmavinni tamani inuit pualluttut immikkut sianiginiarneqassapput, naparsimmaviillu ilitsersorneqarsimapput pisarnerminnit misissugassanik amerlanerusunik tigusisassasut, Flemming Stenz paasissutissiivoq.
- Qujanartumik paasineqarsimavoq nualluut sakkukipajaartuusoq, Flemming Stenz oqarpoq, taassumalu innuttaasut kajumissaarpai puallunnermik qaqutigoortumik atugaqarunik napparsimmavimmut sianertaqqullugit.
- Tamanna pitsaaneruvoq utaqqisarfimmi allanik tunillaanerminngarnit, Flemming Stenz oqarpoq.
Puulukit nualluutaat nunani Kalaallit Nunaata sanianiittut, Canadap USA-llu, qanittuini, tassa Mexicomi, nassaarineqarpoq, sapaatip akunnerani siuliani siullermeersumik tassani paasineqarmat.
Nualluut nutaarluinnaavoq inummiit inummut tunillaattartoq. Tamanna pissutigalugu WHO-p aamma Statens Serum Institutip tamassuma siammariartornera malinnaaffigeqqissaarpaat. Isumaqartoqarpoq nunami nassaarineqarfiani, Mexicomi, inuit 81-it pualluut taanna toqqutigisimagaat.