Skip to main content

Kutterit marluk Diskobugtimi kivisut

Kutterit marluk Ilulissaneersut unnuaq Qeqertarsuup Ilulissallu eqqaanni kivipput. Inuttai tamarmik annaanneqarput.

Kutteri qisuk 42 fodi, Angu II Ilulissaneersoq, unnuaq Qeqertarsuup kujammut kangiani 30 sømilitut ungasissusilimmiilluni kivivoq, kutterimillu piginnittoq inuttaalu ataaseq sikumut niullutik annapput.

- Ippassaq unnukkut unnuap qeqqanut tanneq sisamat Aasiaat Radioannit nalunaarfigineqarpugut kutterimik ajornartorsiortoqartoq, sikumiilluni immalersimasumik. Piginnittullu inuttaatalu namminneq pumpiminnik puttatissinnaasimanngilaat, Aasiaallu Radioatigut ikiortissarsiorlutik, Qeqertarsuarmi politeeqarfiup pisortaa Poul Vittrup oqaluttuarpoq.

Politiit marluk, Arktisk Stationip kutterianit sisammit Porsildimit inuit pingasut, qatserisartorlu ataaseq pumpilik, ornigupput akunnerillu marlussuit angallammik angalareerlutik sikorparujussuit naammattoorpaat, takusinnaallugulu sikut tiggussimaqisut pissutigalugit angutit marluk tikinniarnissaat ajornakusoortorujussuussasoq.

Taamaattumik Ilulissanit helikopterimik qinupput inunnik marlunnik taakkuninnga kivittaammik kivillugit annaassiniartussamik, taannali suli takkutinngitsoq Porsild ajornartorsioreersimaqaluni annguppoq, inuillu marluk, sikumut niusimasut, annaallugit.

- Taamaattumik helikopteri pisariaqarsimanngilaq, Ilulissanili mittarfimmi inunnik aallernissaminut piareersimasimavoq, Poul Vittrup oqarpoq, taassumalu oqaluttuaraa inuit taakkua martluk kutteri Aasianni umiatsialiorfimmut aaqqammersimagaat, Iluilssanullu angerlaannerani immalersimasoq kivillunilu.

Aamma kutteri alla Ilulissaneersoq unnuap ingerlanerani kivivoq. Ilulissani politeeqarfiup ittua Janus Eigaard oqaluttuarpoq nalunaaqutaa 04.11 Aasiaat Radioannit nalunaarfigineqarsimallutik.

- Uppernarsarsinnaavara paasissutissinneqaratta kutteri "Jørgensen" Ilulissat kujataani kivisimasoq, angallammit allamit ikineqarsimasut ajornartorsiortoqanngitsorlu. Taamaattumik pisimasoq annertunerusumik samminngilarput, Janus Eigaard oqarpoq, taassumalu naluvaa inuit qanoq amerlatigisut angallammiissimanersut imaluunnit angallat qanoq angitiginersoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER