Skip to main content

Kalaaleq Mexicomiittoq angerlassaaq

Ilinniartut Danmarkimeersut AFS-ertut, maannakkullu Mexicomiittut svine-influenzartoqarnera pissutigalugu arfininngorpat Danmarkimut angerlartinneqassapput. Taakkulu ilagaat Inuk Qvistgaard Qaqortumeersoq.

– Atuarfipput matoqqavoq. Qitittarfiit aamma imerniartarfiit matoqqapput tamatumunngalu pissutaavoq svineinfluenzamut annilaanganeq. Kisianni qujanartumik illoqarfeeraq uanga najugaqarfigisara eqqugaanngilaq, AFS-ertoq Inuk Qvistgaard sermitsiaq.gl-imut oqaluttuarpoq.

Nunarsuaq tamakkerlugu AFS-ip aqutsisuisa pingasunngormat 29. apriili aalajangerpaat AFS-erltuik ilinniartut tamarmik Mexicomiittut tamarmik nunagisaminnut angerlartinneqassasut tamatumunnga pissutaavoq svineinfluenza ulorianartoq, Mexicomi pingasunngorneq tikillugu 99-it eqqugaasimapput, taakkunanngalu arfineq pingasut nappaammik ulorianartumik toqquteqarsimallutik.

– Tamatumunnga pissutaavoq maannakkut nunat arlallit mianersoqqussutigimmassuk Mexicomut angalanissaq kiisalu Mexicomut angalalluni tikinnissaq matuneqarsimalluni. AFS-erlutik ilinniartut Danmarkimeersut tamarmik, taakkunannga ataaseq Kalaallit Nunaaneersuulluni, Danmarkimut arfininngorpat aallassapput. Ilinniartut Danmarkimeersut arlaannaalluunnit tunillatsissimanngilaq tamarmillu ajunngillat, Københavnimi AFS-ip allaffianeersoq Tim Hubbard sermitsiaq.gl-imut oqarpoq.

Inuk Qvistgaard illoqarfeerannguami, Mexicop qeqqaniittumi, Acámbaromiippoq taannalu 50.000 sinnerlugit inuttaasoqarpoq.

– Innuttasut tamarmik kiinnamut assiaqummik tunineqarput taannalu anileraangamik atisarpaat. Kisianni qujanartumik Acámbaomi svineinfluenzami tunillatsitoqarsimanngilaq. Ugornarpoq maannakkut angerlartitaaleratta. Uanga inuttut nammineq assut soraarummeeqataarusukkaluarpunga. Kisianni maannakkut uagut ilisimatinneqareerpugut Mexico qimassagipput, inuk Qvistgaard Qaqrtumeersoq oqarpoq.

Københavnimi AFS-ip allaffianiit Sundhedsstyrelsenip nittartagaa qanimut malinnaaffigineqarpoq, tassuunakkullu qanoq iliortoqarnissaanik ilitsersuuteqarpoq.

– Oqaatigineqareersutut AFS-erlutik ilinniartut Danmarkimeersut nappasimalersimanngillat imaluunniit arlaannik malunnartoqangnillat svineinfluenzarsinnaanerannik. Taamaattumik Danmarkimut tikikkunik immikkut inissillugit uninngatinneqassanngillat. Kisianni arlaannik malugisaqarsinnaanertik eqqumaffigissavaat, illoqarfinnullu angerlarsimaffigisaminnut ingerlaqqiinnarsinnaallutik, Københavnimi AFS-ip allaffianeersoq Tim Hubbard oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER