Arfiviup neqaa agguaanneqassaaq

Qeqertarsuarmi arfiviup ullumi pisarineqartup neqaa mattaalu, Namminersornerup eqqunneqarneranut atatillugu innttaasunut tunissutitut agguaanneqassapput.

Assi: Saalamiit Møller Lorentzen

- Siornali naalakkersuisoqarfimmi aalajangerneqarpoq arfiviit pisat siulliit marluk kalaallit inuiaqatigiinnut ningerutigineqassasut Namminersornerup 21. juni eqqunneqarneranut atatillugu. Neqi, mattak orsorlu nassiussuunneqarumaarput, Finn Karlsen ilisimatitsivoq.

- Arfiviit pisarineqartut siulliit marluk Namminersornerullutik Oqartussat pigivaat, pisarineqarnissaannullu tunngatillugu naalakkersuisoqarfik angallatinik attartussaaq, qaartartunut patroninullu aningaasartuutit akilerlugit, angallatit attartornerat KNAPK-p akigititai naapertorlugit akilerlugit kiisalu nalunaaquttap akunneri piniarnermut, pilannermut, portuinermut usilersornermut usingiaanermullu aningaasartuutit akilerlugit, naalakkersuisoqarfimmi pisortaq Amalie Jessen nassuiaavoq.

Soqqaat saarngillu N.O. pigivaattaaq, arferillu marluk taakku sumut atorneqarnissaat aalajangiiffigisinnaallugu. Biologit akuerisaapput misiligutinik tigusinissamut arferullu uuttortarnissaanut. RAL-ip aamma RG-p arferup neqaata orsuatalu paarinissaa angallannissaalu akeqanngitsumik isumaginiarpaat.

Powered by Labrador CMS