Nuummi kinguleriiaarunnaarput

2009-mi marsip 30-ianni Nuummi Politiit Kommuneqarfik Sermersooq suleqatigalugu ullaakkut aqqusinikkut angalaneq ikiorserniarlugu misiliummik aaqqissuussipput, ilaatigut sullorsuarmiit Sarfaannguanut aqqusernup siumuinnaq atorsinnaalersinneratigut kiisalu Issortarfimmut eqqaani Kaajallattarfimmiit 400-rtalimmi angalaneq matullugu.

Aaqqissuussineq tamanna pingasunngornermi aprilip 29-ianni 2009 Politiinit aamma Kommuneqarfik Sermersuumit nalilerneqarpoq, naliliinerullu takutippaa misiliummik aaqqissuussineq naatsorsuutigisatut ingerlasimasoq, uullaakkut aqqusinikkut angallanneq eqqarsaatigalugu.

– Nuussuup Nuulllu akornanni kinguleriiaartarnerit peerutipajaarsimapput. Biilertut kinguleriiaartarput sila pissutigalugu kigaatsumik ingerlagaangamik. Tamannartaa qanoq iliuuseqarfigineqarsinnaanngilaq.

– Aaqqissuussinermi misilittakkat ilagaat ullaakkut angallattarnerujussuaq meeqqat atuarfiinut attuumassuteqartorujussuusoq. Piffinni meeqqat atuarfiisa freerfianni imaluunniit feriarfianni angallanneq annertuvallaarneq ajorpoq, tamannalu meeqqat atuarfiisa poorskimi atuanngiffeqarneranni takuneqarsinnaasimavoq, politikommissær John Thorsen tusagassiorfinnut nalunaarummi allappoq.

Naliliinerup aamma takutissimavaa aaqqissuussinermut atatillugu allamik ajornartorsiuteqartoqartoq, tassa ualikkut biilit Nuussuarmukartut kinguleriaartartorujussuusut.

Misilittakkat tamakkua tunuliaqutaralugit Nuummi politiit aamma Kommuneqarfik Sermersuup makkua isumaqatigiissutigisimavaat:

• - Aaqqissuussineq 19. juni 2009-p tungaanut ingerlaannassaaq.
• - Sullorsuup siumuinnaq ingerlaffigineqartarnera ulluinnarni nal. 1200 killormut saattassaaq, taamaasilluni ullaakkut nal. 0700-imiit Nuussuarmiit Nuummut siumuinnaq ingerlaffigineqarsinnaanera nal. 1200-imiit killormut saalluni Nuummiit Nuussuarmut siumuinnaq ingerlaffigineqartalissalluni.
• - Teknikkimut attuumassuteqartut pissutigalugit Nuummiit Nuussuarmut siumuinnaq ingerlaffigineqarsinnaanera sapaatit akunnerisa naanerini atuutiinnartassaaq. Tssa imaappoq sapaatit akunnerisa naanerini Nuummiit Nuussuarmut siumuinnaq ingerlaffigineqartarnera tallimanngornermi nal. 1200 aallartittassaaq aatsaallu ataasinngornermi na. 0700 killormut saattassalluni.

Sullorsuup siumuinnaq ingerlaffigineqartarnerata nikisittarnera sisamanngornermi majip 7-ianni aallartissaaq. Tallimanngorneq, ulloq nalliuttuusoq sapaatip akunnerata naanerata ilaatut isigineqassaaq, taamaasilluni Nuummiit Nuussuarmut siumuinnaq aqqutigineqarsinnaanera sisamanngornermi nal. 1200-imiit aallartilluni ataasinngornermi nal. 0700 tungaanut atuutissaaq.

H.J. Rinksvejip Aqqusinersuullu naapiffianni qullermut ingerlanermut najoqqutassami kinguleriiaartarnermik ajornartorsiut Kommuneqarfik Sermersuup aaqqiisutissarsiorpaa.