Kielsen: Pinngitsuutitsineq demokratiimik innarliineruvoq

Inatsisartuni taasinermi pinerlussimasut politiinit pinngitsuutinneqaraluartut nalakkersuisunut ilaasortap aalajangiusimavaa tamanna demokratiimik ingerlatsinermut uniqqutitsinerusoq.

Inatsisartunut ilaasortat pingasut ukioq manna siusinnerusukkut inatsisatut elektroniskimik taasinermi atortuannik pinerliisut politiinut suliassanngortinneqartut inatsisitigut malersorneqassanngikkaluartut naalakkersuisunut ilaasortap Kim Kielsenip Siumumeersup pisimasut inatsinik unioqqutitsinerusimasut aalajangiusimavaa, knr.gl allappoq.

- Vicepolitimesterip nalunaarutaa tusaatissatut tiguara, kisianni suli aalajangiusimavara Inatsisartut Inatsisaanni 1988-imeersumi paragraf 31-imi toqqaannartumik allassimasoqarmat: 'Inatsisartut taasineranni ilaasortat inatsisartut ataatsimiittarfiani najuukkunik taamaallaat taasisinnaapput'. Uanilu uppernarsaatissaqartumik inatsisartunut ilaasortat najuutinngitsut ilaasortaqatiminnit allanit taasissunneqartut pineqarput. Tamannalu demokratiimik ingerlatseriaatsimut erseqqissumik unioqqutitsinertut taasariaqarpoq, Kim Kielsen, taasinermi pinerlussimanermik suliassanngortitsisuusoq oqarpoq.

Vicepolitimesterip Morten Nielsenip ataasinngormat erseqqissarpaa misissuisoqaqqissanngitsoq.

- Suliap unitsinneqarnissaanik aalajangerninni pingaartumik maluginiarsimavara Inatsiartuni taasinermi inatsisartut maleruagassaannik unioqqutitsinerusoq, aammalu Inatsiartut Inatsisartunut ilaasortanik Inatsisartut ingerlatsinermut malittarisassaannik unioqqutitsisut namminneerlutik iluuseqarfigisinnaagaat, vicepolitimester Morten Nielsen oqarpoq.

Powered by Labrador CMS