Enoksen: Siumut uranisiornermut akerliuvoq
Siumup nunatsinni uranisiornissaq akuersaarsimanngisaannarpaa aammalu akuersaanngisaannartussaallugu, Siumup siulittaasua erseqqissaavoq.
Narsami bormesteriusimasoq Jørgen Lund KNR-ip radioaviisiani nalunaarpoq Siumumit tunuarluni, tamatumunnga tunngavilersuuteqartinneqarluni Siumup uranimik piiaaniarnermut akuersaartunngorsimammat nammineq peqataaffigisinnaajunnaarlugu.
- Siornatigut erseqqissaatigisimasarput erseqqissaatigeqqissavarput: Siumup Nunatsinni uranisiornissaq akuersaarsimanngisaannarpaa aammalu akuersaanngisaannartussaava, Hans Enoksen allappoq.
- Taamatut nalunaaruteqarneq aallaqqaataaniilli tusagassiortunit Inatsisartunilu illua-tungiliuttunit “Narsami uranisiorniarnermik” tamatigorluinnaq taaneqartalerpoq. Innuttaasunik paatsiveerussaaneq taanna allaat Siumumi ilaasortat ilaannut sunniuteqarsimasoq Jørgen Lundip erseqqissarpaa.
- Taamaammat Inatsisartunut qineqqusaarnermi ileqqorissaarnissaq eqqortunillu tunngaveqarluni inuiaqatigiinnut paasisitsisarnissaq Siumumit kissaatigaarput. Tassami Siumup anguniagaasa paatsoortuusaarluni saqqummiunneqartarneri inuiaqatigiinnik pututitsiniaanertut eqqunngitsunillu tunngaveqarluni qineqqusaarnertut taaneqartariaqarmata, Hans Enoksen allappoq.