Iluatsilluarneq nalinginnaanngitsoq

Semitsiap internetimi aviisia Kalaallit Nunaanni oqaatsit marluiit atorlugit ingerlasoq internettikkut nutaarsiassaqartitsiviit qularnaatsumik annersaraat. Iluatsilluarnerlu ingerlaannarpoq.

Sermitsiap internetimi aviisiata sermitsiaq.gl-ip atuartartui amerliartuinnarput, maannalu danskit netaviisiini annersat ilaannut nallersuussinnaalerluni, tamanna TNS/Gallup-imiit kisitsisit nutaanerpaat takutippaat.

Ukioq manna marsimi quppernermut sermitsiaq.gl-imut alakkaasut 1.044.005-iusimapput. 2008-mi qaammammi tassani 855.490-iusimapput. TNS/Gallup-ip naatsorsuutai naapertorlugit marsimi sermitsiaq.gl-imut alakkaasut 379.000-iusimapput. Siorna qaammatip taamaalinerani alakkaasut 284.195-iusimapput.

– Kisitsisit takutippaat sermitsiaq.gl assut iluatsilluarsimasoq, unammillertinillu qaninnerpaanut malunnartumik annerulluni. Piviusut isigissagaanni nettimi pimoorullugu nutaarsiassaqartitsivik alla ataasiinnaavoq, tassalu knr.gl. Saniatigut pingaartitsisut kalaallit nunaanni nutaarsiassaqartitsivinniit katersillutik nittartakkamiititsisut ingerlapput, kisianni nutaarsiassaqartitsivinnik allanik uuttortarneqarsinnaasunik takusaasartunik maannakkorpiaq peqanngilaq, Nicolai Jakobsen Sermitsiami nittarsaassisartut pisortaat taamak oqarpoq.

– sermitsiaq.gl Kalaallit Nunaanni webside-t alliartortut sukkanersaannut ilaavoq. Nutaarsiassanik aallartippugut, kisianni aamma ullumikkut tv-qarfimmi online-imik Kalaallit Nunaannit tamaniit TV-kkut ilanngutassianik ingerlatsivugut. sermitsiaq JOB - naqitanik web-ikkullu sulisussarsiornernut atasunngotikaq - aqqutigalugu Kalaallit Nunaanni suliffissarsiorfiusinnaasut annersaraatigut. Niuffaffik annertooq ingerlapparput, annertuumik assiisiveqarluta allaallumi kalaallit nunaanniit nutaarsiassat tuluttut aamma pigalugit, Nicolai Jakobsen oqarpoq.

Taassuma sermitsiaq.gl-ip angissusia danskit nettikkut aviisiinut toqqaannartumik sanilliuppaa - innuttaasut amerlassusaannut tunngasut ilanngunnagit. Ullut ilaanni sermitsiaq.gl-ip atuartartut assersuutigalugu nordjyske.dk-p (Nordjyske Stifttidende), vejleamtsfolkeblad.dk, kristeligt-dagblad.dk aamma stiften.dk-p (Aarhus Stifttidende) atuartartuisut amerlatigisarput.

– Taamaalilluta Danmarkip immikkoortortaanut angisuunut nallersuuppugut, allaallumi nuna tamakkerlugu ingerlasumut Kristeligt Dagbladimut. Taamaalilluta Kalaallit Nunaanni nutaarsiassaqarfinni annersaaginnarata aamma naalagaaffeqatigiiffimmi nutaarsiassaqartitsiviit annersaasa ilaannut internettikkut ingerlatsivinnut nallersuuppugut, Nicolai Jakobsen erseqqissaavoq.

Powered by Labrador CMS