Skip to main content

Sakkutuut qaartartoq misissorpaat

Takornariap Narsarsuarmi qaartartoq qanganisaq ananasgranat nassaarivaa.

Isumassatsialaavoq tummagassat mianerissallugit siornatigut sakkutooqarfiusimasuni angalassagaanni. Taamatut siunnersuipput illersornissamut sakutuut naalagaat (Forsvarskommandoen) Kujataani Narsarsuarmi ujaqqaat akornanni takornariap qaartartumik qanganitsamik nassaarnerata kingorna.

Naatsorsuutigineqarpoq qaartartoq sorsunnersuup kingulliup nalaani tuluit qimatarisimassagaat, taamanikkut iligiit tamaani sakkutooqarfeqamata. Nuummi politiit aamma qallunaat sakkutuui imarsiortut nassaartoqarnerata kingorna ingerlaannarlutik pilertortumik iliuuseqarput, inuttallu Hvidbjørnenimeersut qaartartumik misissuiartortillugit aallartillugit, forsvaret.dk allappoq.

Misissuinermiit inernerit suli piariinngillat. Nalilerneqarpat qaartartoq qaartillugu suujunnaarsinneqassasoq taava pisariaqassaaq Danmarkimiit ikiortissanik pissarsinissaq, tassami Kalaallit Nunaanni sakkutooqarfiup tamaatut suliaqarnissamut piginnaanernik peqanngilaq. Taamaattumik tamanna siusinnerpaamik sapaatit akunnerata tullianik pisinnaassaaq, sakutuut naalagaat naliliivoq.

Siusinnerusukkut nunami qaartartunik qaarneqangitsunik piaaqataasarsimasoq, Svend Erik Hendriksenip, Kangerlussuarmi najugaqartup inassutigaa qaartartoq nunami maannakkut inissisimaffianiitillugu qaartinneqassasoq, tamatumunnga pissutaatippaa aasaanerani kiassusiata aamma ukiuunerani issittarnerata assigiinnginnerujussuat aammattaaq qaartartup Sorsunnersuarmi Kingullermiilli toqqaannartumik seqinermiissimanera qularnanngimmat.

– Tassami qaartartoq ukiut 50-it sinnerlugit pisoqaassuseqarmat ilimanaateqarluinnarpoq qaartartortaata seqummalasimanera kiiisalu nitrogluserineqassasoq. Qaartartumut qaartitsissutaasartoq pentrit, ukiut taamak amerlatigisut nunaannarmiissimalluni, attuallalluguluunniit inuunermik uloriarnartorsiortitsisinnaavoq, S.E. Hendriksen qaartartumik nassaarsimaneq pillugu oqaluttuaq pillugu oqaaseqarnermini oqarpoq.

Isumaqarporlu kialuunniit sakkutuunut naalaganngortussatut ilinniagaqarsimasup qaartartoq miloriuttagaq qaartillugu suujunnaarsissinnaagaa. Qaartitsissutaata peerneqarsinnaanera misissussallugu, qaarsinnaajunnaartinneqarsinnaanera paasiniarlugu taanna ulorianarnerujussuuvoq.

– Suujunnaarsillugu qaartissagaanni atugassat tassaapput 500 gr. trotyl, qaartartumut qaartitsissut kiisalu qaartartup iperaa arriitsumik ikumasartoq, pussugutit aammattaaq innerit, S. E. Hendriksen ilisimatitsivoq.

Siusinnerusukkut qaartartut qanganisaat aamma imassat Kalaallit Nunaanni sakkutooqarfiusimasut eqqaanni nassaarineqartarsimapput. Kisianni imaanngilluinnarpoq tamanna ullut tamaasa imaluunniit ukiut tamaasa pisartoq, Kalaallit Nunaanni sakkutooqarfik ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER