Qalasersuaq ukiut 100-t matuma siornagut anguneqarpoq
Robert Pearyp tassumalu qimusseqataasa kalaallit Qalasersuaq angumassulli ukiut 100-nngortorsiorneq nunatsinni malunnartinneqanngilaq.
Kalaallip qimussersartup misigisassarsiortartullu Ole Jørgen Hammekenip Uummannameersup nalliuttorsiornermut peqataanissani aningaasatigut tapiisukippallaarnera peqqutigalugu taamaatiinnarsimavaa. Eqqarsaataasimagaluarpoq qimussersartut allat peqatigalugit Pearyp illerngi atuarlugit Qalasersuarmut angalanissaq, taamaalillunilu kalaalliniit malunnartillugu. Angalanerup piviusunngoritsinissaanut aningaasat 2 millioner kronit katersorniarnerat iluatsinngitsoorpoq.
Pisimasorli ilaatigut Pearyp kinguaavinit malunnartinneqassasoq, Bert Peary Stafford, Sikunews.com-imut oqarpoq.
Aataqqiimi admiral Robert Pearyp ukiut 100-t matuma siornagut Matthew Henson, kalaallillu ikiuuttut Uutaaq, Iggiannguaq, Higluk aamma Aaqqioq peqatigalugit nikorfaffigisimasaani Bert Peary Stafford apriilip 6-ianni ullaakkut nikorfassaaq.
Pearyp erngutaqqiutaata aataqqiimi ullorsiutaanit atuaassaaq, aammalu Pearyp nammineq sekstantiutai atorlugit Qalasersuup sumiiffippiaa naatsorsorniassallugu.