Inissialiarsuit PCB-qarnersut misissorniarpaat
Namminersornerusut Nuummi inissiarsuarmi PCB nassaarineqareersorlu nuna tamakkerlugu misissuisitsinialerput.
Sapaatip akunnerata siuliani Nuummi Tuapannguani Blok Q-kumi isatikkami PCB-mik nassaartoqarnera Sermitsiami allaaserineqarpoq. Namminersornerusut maanna nuna tamakkerlugu misissuisitsinialerput, inissialiarsuit qassit avatangiisinut toqunartumik PCB-mik (PolyChloreredeBiphenyler) akoqarnersut paasiniarlugu, knr.gl allappoq.
Misissuineq qaammat una ingerlanneqassaaq, inernerillu takutissavaat, ajornartorsiut qanoq annertutiginersoq. Tassami Nuummiinnaanngitsoq inissialiarsuit avatangiisinut toqunartumik ulorianartumik akoqarsinnaanerat pasitsaanneqarpoq.
- 1960-ikkunni 1970-ikkunnilu inissialiortiternerit assigiittorujussuusut nalunngilarput, sinerissamilu inissialiarsuit quleriiaat sanaartorneqartorujussuullutik, tamakkulu assigiiaaqaat. Tamakku misissuiffiginiarpagut, Ineqarnermut Attaveqarnermullu Naalakkersuisoqarfimmi pisortaq Steffen Ulrich-Lynge nassuiaavoq.
Avatangiisinut Pinngortitamullu Nakkutilliisoqarfiup maanna aamma Blok Q-mi illorsuarmit igitassat illersorneqarsinnasumik qanoq suliarineqassanersut misissuiffigissavaa. Saniatigut aamma Blok R-ip aamma Blok S-ip sinnikuinit eqqakkat misissuiffigineqassapput. Blokit taakku eqqagassartaat Nuuk Imerup tunuani imaanut eqqarnikuupput, taamalu maanna eqqakkat PCB-mik akoqarnersut misissugassanik tigusisoqassaaq, aamma uumasunut imaanullu sunniuteqarsimanersoq misissorneqassalluni.
- Eqqakkat ulorianartut immikkoortinneqarsinnaanerat misissorparput. Killissarititaasoq aalajangersimasoq sinnerlugu ulorianaateqartuuppata tamakku Danmarkimi naleqquttumut inissinneqassapput, Stefen Ulrich-Lynge oqarpoq.