Kuultisiorfik ammaqqinniarpaat
Aatsitassarsiutileqatigiiffiup Angus & Rossip Nalunami kuultisiorfik ukioq kingulleq matuneqartoq ammaqqinniarlugu pilersaaruteqarpoq.
Angus & Ross piginnittuusunut Crew Gold Corporationimut Nalunami kuultisiorfimmi aktiat pisiarinissaat pillugit isumaqatigiissuteqarsimavoq, aningaasanngorlugit 1/2 million dollarsinik akilerlugit. Tuluit aatsitassarsioqatigiiffiata piiaanerit ukioq manna kvartalit pingajuanni ammarnissaat naatsorsuutigaa, rttnews.com allappoq.
Isumaqatigiissut apriili naatinnagu atsiorneqassangatinneqarpoq. Peqatigitillugu Angus & Rossip piiaanissamut avatangiisinullu pilersaarutit Namminersornerusut Aatsitassarsiornermut Pisortaqarfianut tunniunniarpai.
Angus & Ross isumalluarlutik kuultisiorfiup ukiuni 10-ni ammatinnissaa pilersaarutigaa. growthbusiness.co.uk naapertorlugu kuultimit isertitat aatsitassarsioqatigiiffiup Kalaallit Nunaanni aningaasaliiffigisaanut annertuumut atorniarneqarput - tassa Uummannap eqqaani Inngili Qernertumi zinkimik aqerlumillu piiaaffimmut.