Lars-Emil tunuarpoq
– Suliffimmi sulisut siumaluttut najorusunngilakka, Lars-Emil Johansen oqarpoq. Tallimanngormat unnukkut naalakkersuisut nalunaarfigai Air Greenlandip siulersuisuiniit tunuarluni.
Lars-Emil Johansenip Air Greenlandip siulersuisuini siulittaasunngornissaa sulisut siulersuisuni ilaasortaatitaasa akerlerisimagunarpaat. Tamannarpiaavorlumi politikerip timmisartuutileqatigiit siulersuisuini issiarusunnginnerminut sisamanngornermi naalakkersuisunut nalunaaruteqarnermini tunngavilersuutaa.
Sulisut ilaasortaatitaat namminneq oqaaseqarusunngillat.
– Oqaaseqaatissaqanngilagut, sulisut ilaasortaatitaat Claus Motzfeldt sisamanngornermi siulersuisuni ilaasortatut qinigaaqqittoq oqarpoq. Sulisut sinnerlugit ilaasortat allat marluk tassaapput Elisabeth Fisker aamma Niels Frederiksen.
Kisianni tassa sulisut sinniisaasa Lars-Emil Johansen siulersuisuni siulittaasunngornissaanut akerliunerisa Lars-Emil Johansen tunuarniuteqartippaat.
– Naalakkersuisut ippassaq (sisamanngornermi, aaqqiss.) nalunaarfigaakka, toqqagaaneq tigorusunnagu, siulittaasunngornissara sulisut sinniisaasa akerliuffigisimammassuk. Uangalu kissaatigineqarnanga nalunagu tassaniissinnaanngilara, Lars-Emil Johansen Sermitsiamut oqarpoq.
– Eqqissiviilliorfiusumiinnissara ajorinngilara, kisianni sulisut sinniisaasa siulittaasuunissara kissaatiginngikkaat paasillugu sunnertinnarpoq. Uangalu sulisut sinniisaat assorsuaq ataqqisaraakka, Lars-Emil Johansen oqarpoq.
Lars-Emilip peqatigitillugu erseqqissarpaa pisortap Michael Binzerip siulersuisut siulittaasuattut akerlerissappani tupaallaatigissanagu.
– Machael Binzerip siulittaasutut kissaatiginanga oqarsimanersoq naluara, kisianni pisortap siulersuisuni siulittaasoq atorfinitsinneq ajorpaa, illua-tungaanoorppoq, Lars-Emil Johansen sermitsiaq.gl-imut oqarpoq.
– Kisianni suna pillugu aamma qanga taamak oqarsimagami?
– Aap, kisianni tusarpara anillakkami kissaatiginanga oqarsimasoq. Kisianni taanna aalajangiisuunngilaq. Sulisut isumaat aalajangiisuuvoq. Kisianni tamanna sulisut sinniisaasa isumaannut attuumassuteqarnersoq naluara. Kisianni sulisut sinniisaasa kissaatiginngippannga oqarpunga tamanna ataqqiniarlugu, Lars-Emil Johansen oqarpoq. Taassuma sulisut sinniisaasa aalajangernerat naalakkersuisunut ilaasortamit Kim Kielsenimit sisamanngormat unnukkut paasisimavaa.
– Naalakkersuisut siulittaasuanut allagaqarpunga tunuarlunga, kisianni tassanngaaniit tusagaqaqqinngilanga. Kisianni ima isumaqarpunga, uanga pissutigalunga inuit toqqissisimanngippata tassaniikkusunngilanga. Air Greenlandimi siulersuisuni siulittaasuunissaq sinnattuma annersarinngilaat, Lars-Emil Johansen - timmisartuutileqatigiinni 1988-imiit 1991-imut siulittaasuusimasoq - oqarpoq.
Siulersuisuni siulittaasunngornissamut neqeroorut tunniunneqaqqimmat nangaajallasimanngilaq. neqeroorut qinersinissap pingasunngormat nalunaarutigineqarnera sioqqullugu tunniunneqarsimasungavoq.
– Ungasinngitsukkut aperineqarpunga, oqarpunga ajunngitsumik sulisinnaassuseqartunga isumaqarpata akornutissaqartinnagu.
– Ungasinngitsukkut? Qangaava?
–
, aap, tassa eqqaamanngilara.
– Inatsisartunut qinersinissap nalunaarutigineqarnissaa sioqqullugu?
– qinersisoqarnissaata nalunaarutigineqarnissaa sioqqulugu, aap.
– Angerninnut suna peqqutaava?
– isumaqarpunga ulluni makkunani angallannikkut allanngortiterisoqarnialersoq pissanganartorpassuit ingerlasut. Isumaqarpunga timmisartuutileqatigiit siunissamut piareersartariaqartut, ullumikkut ingerlatseriaaseq atornagu, aammalu mittarfeqarfinni pissutsit timmisartullu mittarfiini pissutsit eqqartueqataaffigalugit, tamatta angalasinnaasariaqarpugut, aamma Kalaallit Nunaanni inuinnarnut. Suut tamarmik akitsoraluttuinnartinngait ajorsigaluttuinnartinnagillu, akerlianik pissutsit pitsaanerulersikkusullugillu akikinnerulersikkusuppakka, aamma kalaallit nunaata iluani, Lars-emil Johansen oqarpoq.