U21-t marloriarlutik asuli utaqqitinneqarput

Angutit assamik arsartartut Agentinamut aamma Chilemut sungiusarlutik unamminissaminnut utaqqilussiinnarput.

Assiliisoq: Jørgen Chemnitz

Ataatsimut katillugu nalunaaquttap akunnerini 40-ni angalareerlutik kalaallit nunanut allanut unammisartui U-21 Argentinami Buenos Airesimut arfininngormat aqqarnganni, tamaani nalunaaqutaq malillugu nal. 19.00 tikipput.

Sapaammi Argentinamut sungiusarluni unamminissaq pilersaarutigineqarsimavoq, kisianni tikinnermi kalaallit angalasui ilisimatinnqarput unammineq pivisunngortinneqarsinnaanngitsoq, kiisalu sungiusarluni unamminermi Chile imaluunniit Mexico sapaammi unnukkut nunatta nalunaaqutaa malillugu nal. 18.00 unammineqarsinnaassasut.

Kalaallit unammisartui unamminissamut piareersarput, kisianni nalunaaqutaq 18.00-inngormat sungiusarlutik unammisassaat suli takkutinngillat:

- Soorunami tamanna assorsuaq uggornarpoq, unamminermi piviusunngunngitsoorpoq tassami pitsaassagaluaqimmat maani avatangiisini nutaani "nissuni unammisimaneq misigisimassallugu" unammisaqattaanerit aallartinnginneranni. Kisianni unammisartut pilereqaat unamminissaqattaarnissamullu piareersimalluinnarlutik, sungiusaasuat Jakob Andreassen oqarpoq.

Ullumi ataasinngornermi unammisartut marloriarlutik sungiusarput kiisalu aqagu unammisaqattaarnerit aallartippata Kalaalit Nunaat siullermeerluni Brasiliamut unammissaaq nunatsinni nalunaaqutaq malillugu nal. 18.00, Brasilien aamma Argentina unammisaqattaarnerni ajugaasussatut ilimagineqarnerpaapput.

Powered by Labrador CMS