Atuartunut 6.600 koruunit katersorneqarput
Gribskov Efterskolemi atuartut atuarfik ikuallammat pigisaminnik tamanik annaasaqartut aningaasanik ikituinnarnik pissarsissunneqarput.
Atuarfiup 80-ingajannik atuartoqartup atuartuisa procentii qulit Kalaallit Nunaanneersuupput - taakkulu atuartut atuarfiup ikuallanneranit annertunerpaamik eqqugaapput. Taakkunannga arfineq pingasuusunit arfineq marluk pigisatik tamarluinnaasa annaavaat, kiisalu ataataminnut anaanaminullu iniminnut kialaartumut angerlarfissaqarnatik atisassamaatinik allanillu assigisaanik pissaqartinneqarlutik, dagbladetonline.dk, allappoq.
Taamaattumik Københavnimi Kalaallit Illuutaat atuartut taakku katersuunneqarnissaannik aaqqissuussivoq. Katersuiniarnq marlunngormat naammassivoq Pia Rosing Heilmann Københavnimi Kalaallit Illuutaanneersoq paasissutissiivoq, katersuiniarnerup inernerigallagaata takutikkaa katillugit 6.600 koruunit oqarasuaatit angalattakkat, ordbogit, nipilersukkat CD-it Gribskov Efterskolemi kalaallinut atuartunut arfineq marlunnut katersornneqarsimasut.
Gribskov Efterskolemi ilinniartut Tisvildelejemi Sankt Helene Centerimi utaqqiisaagallartumik ineqartinneqarput, tamaani atuarneq ingerlalluarneqarpoq. Porskip kingorna Unnerupimi illunut nutsissapput.
Efterskolemi atuartut tamarmik ilinniarnerminni ingerlalluaqqilereerput. Taamaattorli atuartoq 15-inik ukiulik piaarinaatsoorluni atuarfimmik ikuallatsitsisoq taamaanngilaq.
Nukappiaqqap pappiaqqat ammalortuaranngorteriarlugit ikuallatseriarlugit milorujuttaqattaarsimavai, ammalortuarallu ataaseq illup qaavanut tuppoq. Nukappiaqqap nammineerluni ikuallattoq qaminniaraluarpaa kisianni inneq siaruarpoq.
- Nukappiaraq assut nallinnarpoq tassami piaaraluni taamaliunngilaq, Gribskov Efterskolimi pisortaq Søren Møller oqarpoq.
Pisimasut tunngavigalugit 15-inik ukiulik piarinaatsoorluni ikuallatsitsisimasutut unnerluutigineqarpoq.