amerikamiut aqqartartui isertortumik Kalaallit Nunaannut
Amerikamiut sakkutuut imarsiortuisa aqqartartumik issittup imartaani qanoq periallaqqitsiginera qanorlu saassusseriallaqqitsiginera misilittarniarpaa.
Amerikamiut aqqartartui marluk sungiusarnermut Ice Exercise 2009 atatillugu isertuussamut angalassallutik nipaatsumik issittup imartaanut allarsimapput, taamak berlingske.dk allappoq.
Aqqartartup aappaa "USS Helena" San Diegomiit aallareerpoq, aqqartartup aappaata "USS Annapolis"-ip sakkutuut imarsiortut umiarsualiveqarfiat Norfolk qimareeraa.
Aviisi Los Angeles Times taamak allappoq, taassuma amerikamiut sakkutuui imarsiortut issuarnerarpai angalanermi Issittup imartaani "aqqartartut qanoq periallaqqitsiginera saassusseriallaqqitsigineralu misiligarneqassasut.
Aqqartartut Alaskap avannaani sungiusassapput, kisianni aamma imaatigut aqqutit qanoq innerat apeqqutaatillugu Kalaallit Nunaata eqqaanut apuussinnaapput.
Aqqartartunut ilaapput Alaskami Applied Physics Laboratory Ice Station-imiit ilisimatuut. Taakku ilaatigut aqqartartut issittup imartaani nilleqisumi aqqarsimatillugit attaveqaatitigut atortui qanoq atortarnersut misilerarneqarneranni ikiuutissapput.
Nunanit assigiinngitsunit amerliartuinnartuniit sakkutooqarnikkut soqutiginninnerit annertusiartuinnarput. Taamatut soqutiginninneq nunarsuup kissatsikkiartorneranut atatilugu pisuussutit assigiinngitsut, ilaatigut uulia, siunissami piiarneqarsinnaalernissaanut attuumassuteqartinneqarpoq.