Paasisitsiniaanerit sunniuteqanngitsut
Misissuisaqattaartarnerit uppernarsarpaat paasisitsiniaanikkut isumaginninnermi ajornartorsiutit allanngortinneqarneq ajortut.
- Sumiginnaanermik, naartuersinnernik meeqqanillu inissiisarnernik kisitsisit allanngorneq ajorput, taamaattumik attaveqaqariaaseq nutarterneqartariaqarpoq. Paasisitsiniaanerit sunniuteqarluarnerussapput, Naja Paulsen, Nuummi tusagassiortunngorniarfimmi pisortaq, oqarpoq.
Paarisa ukiuni arlalinni paasisitsiniaasarsimavoq kinguneqarneq ajortunik. Kingullermik misissuinerup "Kalaallit Nunaanni meeqqat" uppernarsarpaa suli pissutsit ajortorujussuusut kinguaassiuutitigut atornerluinerit eqqarsaatigalugit, nalunaarusiamilu inerniliinerit ilagaat. tamatuminnga paasisitsiniaasoqassasoq.
Bo Kleffel, DB reklamemi attaveqarnermut siunnersorti, Sermitsiamut oqarpoq:
- Paasisitsiniaassagaanni anguniagaqarfiit kinaassuserneqaqqaartariaqarput. Taamaasiunngikkaanni nalunaajaatit maangaannassapput aningaasallu atulussinnarneqarlutik.
Tamatumunnga Anita Johansen, Paarisameersoq, oqarpoq:
- Ataatsimut innuttaasunut saaffiginnittarpugut.
Naja Paulsenip tikkuarpaa paasisitsiniaanernik suliaqarnerni ikiortissaqartoqartoq:
- Apeqqutaappat paasisitsiniaanermut Paarisa akissaqanngitsoq, taava universitetimi ikiorsiisoqarsinnaavoq. Tassani inoqarpoq siammarsaanermik ilisimasalinnik.
Tusagassiortunngorniarfiup saniatigut Nuummi universitetimi, Ilisimatusarfimmi tusagassiornermik ilisimatusarnermut immikkoortortaqarpoq.
Sermitsiami nr. 11-mi, sapaatip akunnerani uani saqqummersumi, annertunerusumik atuarit.