Misigisassarsiortartut nunarput itivillugu
Misigisassarsiortartut marluk Kangerlussuarmiit Sermersuaq itivillugu Kalaallit Nunaata kangiata avannaanut pisunniarlutik aalajangersimapput, angalasullu angalanertik Qaanaami naammassiniarpaat.
Pisunneq marsip 15-iani aallartittoq Qaanaami juunip 15-iani naammassissangatinneqarpoq. Pisuffissaat 3.500 kilometerit missaannik isorartussuseqarpoq.
Angalasut Kangerlussuarminngaaniit aallartillutik avannamut kangimut Vildtlandimut Navy Cliffimullu ingerlaassapput.
Misigisassarsiortartut tassanngaaniit Kalaallit Nunaat avannaqqullugu Kap Bridgeman aqqusaallugu nunarsuarmilu nunat nunavimmut atasut avannarlersaata nuua Kap Morris Jesup saneqqullugu ingerlaariarlutik Nyebo Land aamma Hall Land aqqusaarlugit ingerlaqqissapput.
Tassanngaaniit angalaasut Wahington Landikkut Inglefieldikkullu ingerlaariarlutik Kalaallit Nunaata kippasinnerpaartaanut Kap Alexanderimut tassanngaaniillu Qaanaamut apuutissapput.
Misigisassarsiortartut marluusut Jesper M. Ganc-Petersen aamma Erik B. Jørgensen ilaatigut Siriusimi nakkutilliisutut sulisimapput.
Angalasut angalanerminnit ullorsiusiorniarput, ilaatigullu aamma sumiffiit oqaluttuarisaanermut pingaarutillit aqqusaartassallugit. Anguniarneqarpoq - angalanerup imminerup saniatigut - atuakkamik saqqummersitsinissaq angalanermillu filmiliornissaq.
Pisummik angalasut taakku marluk nassatatik tamaasa qamuteeqqanik assartorniarpaat, sisoraatinik ingerlateqassallutik anorlileraangallu tissiartaarutit atortassallugit.