Politiit biiliinik inuinnartut biilersimanernit suliassanngortitaqanngilaq

Politiini sulisut suliffimmut atasumik biilit sulinngiffiup nalaani atuisarsimanerannik suliassanngortitsisoqarneraasoqarnera politimesterip eqqunngitsuunerarpaa.

Pilitiit qullersaqarfiata politiit biiliinik inuinnartut ingerlatsisarneq akuerisinnaanngilaa. Assiliisoq: Leiff Josefsen

Politiini sulisunut suliffimmut atatillugu biilit sulinngiffiup nalaani atoqqusaannginnera politiini ukiualunni inerteqqutaasimavoq. Tassungalumi tunngatillugu ukiuni arlalinni suliassanngortitaqartoqarsimanngilaq. Tamanna Sermitsiap politiit akornanni sulinngiffiup nalaani biilertoqartarsimanera pillugu allaaserinnereersorlu politimesterip Steen Silberg Thomsenip erseqqissarpaa.

Allaaserisaq naapertorlugu politiit qullersaqarfiata aalajangersimavaa sulisoq ataasiaannarluniluunniit politiit biiliinik sulinngiffimmi nalaani biilissagaluarpat pineqartoq akitsuutinut 40.000 kronenik akiligassinneqarsasoq. Kisianna tamanna eqqunngilaq, politimesteri erseqqissaavoq. Politiit qullersaqarfiata akileraartarnermut nakkutilliisoqarfimmiit nalinginnaasumik paasissutissat sulisunut ingerlateqqiinnarsimavaat, politiit namminneq malittarisassaannut tapertassatut.

- Akileraartarnermut nakutilliisut kvartalikkaartumik ataatsimeeqatigisarpagut. Taakkunanilu ilisimatinneqarpugut politeeq sulinermut atatillugu biilimik sulinnginnermi nalaani biilersimagunartoq pillugu innuttaasuniit saaffiginnittoqartarsimasoq. Tassunga atatillugu nakkutilliisut pineqartumut tunngatillugu malittarisassaqartoq erseqqissarpaat, tassa suliffimmut atatillugu biili sulinani atorneqarsimappat akileraartitsisoqarsinnaasoq. Ilisimatitsissut taanna uagut ingerlateqqissimavarput, Steen Silberg Thomsen oqarpoq.

Pineqartoq aamma suleqatigiissitaliami qanittukkut oqaluuserineqarsimavoq. Tassanilu erseqqissarneqarpoq politiit biilii privatimik atorneqassappata akuerineqarsinnaanngitsoq.

Politimesterip tassunga atatillugu erseqqissarpaa politiit sulinnginnermi nalaani politiit biilii atussappatigit tamanna malittarisassanik ukioqqutitsinerusoq.

Illuatungaatigut pisoqarsinnaavoq politeeq - sulitilluni - politiit biiliannik namminerminut iluaqutissatut atorsinnaasoq. Tamanna malittarisassanik unioqqutitsinerussanngilaq, Steen Silberg Thomsen ilisimatitsivoq.

Assersuutigalugu imaassinnaavoq politeeq nal. 16.00-imiit aqaguani ullaakkut 08.00-ip tungaanut pigaartuusoq. Pisinarsinnaasariaqarput, il.il., aammalu pigaartut telefonikkut kalerrinneqarunik pilertortumik ingerlasariaqalersinnaallutik.

Powered by Labrador CMS