Atuartut pujortarunnaarniartut

Pujortarunnaarneq sakortusinnaasarpoq. Aamma meeqqat atuarfianni pujortarnermik sungiussilluarsimasuunngitsunut, taamak Nuummi atuarfinni marlunni misilittagallit oqarput.

Pujortarunnaarnissamut ilitsersuisartup Nina Møllerip cigarettini stoffit toqunartullit atuartut nassuiaatitsissutigisarpai. Assi: Kommuneqarfik Sermersooq

Meeqqat atuarfianni atuartunit annerneersut 16-it ulluni makkunani pujortarunnaarniarlutik kursusernertik naammassilerpaat. Meeqqat atuarfianni atuartunut pujortarnermik sungiussilluarsimasuunngitsunut pujortarunnaarniarneq sakkortusinnaasarpoq. Pinngitsuuisinnaajunnaarsimanermit aniguiniarnerup saniatigut aamma ileqquliussimasat, arlaleriinnit tatineqarnerit pissutsillu allat pujortarusulertarnermut peqqutaasartut isummerfiginiartussaapput, Sermersooq.gl allappoq.

Taamaakkaluartoq atuartut ilaasa kursusi naammassillugu pujortarunnaartarput. Pujortarunnaartitsiniarluni kursusi januaarimi aallartimmata 29-it kursusimut peqataaniarlutik nalunaarsimapput. Arlallit taamaatiinnartut allat nutaat ilannguttarput, ullunilu makkunani meeqqat atuarfianni atuartut 16-it kursusernertik naammassillugu pujortarneq ajorpunga-mik imminnut oqaatigisinnaalissapput.

Tamanna sioqqullugu ilungersorluni sulineq ingerlasimavoq, tassani pujortarunnaarnissamut ilitsersuisartut aappaata Nina Møllerip pujortartarnerup iluaqutissartai ajoqutissartaalu pillugit atuartut paasitinniarlugit siunnersorlugillu ilitsersorsimavai.

- Atuartut ilarpassuisa uanga anaanatut pujortarunnaarnissaannik aqullugit pissusilersorfigissagikka naatsorsuutigisarpaat. Uanga oqaluttuuttarpakka taamatut ingerlasoqarneq ajortoq, aammalu pujortarunnaarnissartik namminneq siulliullutik iliuuseqarfigissagaat sulissutigalugulu, Nina Møller USK-imi Kangillinnguit Atuarfiat-nilu atuartunut pujortarunnaarsitsiniarnermik kursusertitsisartoq nassuiaavoq.

Powered by Labrador CMS