Finlandimiup qulliit qamillaqquai
Unnugu qulliit nalunaaquttap akunnerani ataatsimi qaminngatillugit ilaquttasi ikinngutisilu nuannisaaqatigisigit, Petri Jaartoq Finlandimeersoq kajumissaarivoq.
Jaartop sapaatip akunnerani kingullermi Sisimiuni ataatsimeersuarneq Cold Climate HVAC naggaserlugu filmi minutsinik marlunnik sivisussusilik Earth Hour, silarsuarmi illoqarfissuit piffissammi 20.30 - 21.30 qullernik qaminngatitsinissannut tunngasoq takutippaa.
Kalaallit Nunaannilu Kommuneqarfik Sermersuup borgmesteria Asii Chmenitz Narup pilersaarummik tapersersuivoq.
Kommunip Qaminngaalaarnermik taallugu marsip 28-anni piffissami 20.30 - 21.30 qullernik qaminngatitsinissaq kajumissaarutigaa, Nukissiorfiit suleqatigalugit allaat aqquserngit qulliisa kommunimi tamarmi qaminngatinneqarnissaat suliniutigalugu.
Nuuk Utoqqarmiut Kangerluarsunnguanni erngup nukinganit nukissiuuteqarnermigut CO2-mik anititsiviunngikkaluarpalluunniit Petri Jaarto isumaqarpoq illoqarfiup qullernik qaminngatitsinissaa ajunngilluinnartoq.
– Taamaalilluni nunarsuarmi silap kissakkiartorneranut qanoq iliuuseqaqataajumaneq ersersinneqassaaq.
Siullermik 2007-mi Sydney-mi Earth Hour-eqartoqarsimavoq. Taamaaliortarneq taamanerniit siaruaakkiartulersimavoq. Massakkullu nunani 80-ini innuttaasut suliffeqarfiillu qullitik qaminngatittalerpaat. Danmarkimi kommunit qullernik qaminngatitsisartut 71-inngorsimapput, Kommuneqarfik Sermersuullu saniatigut aamma Thorshavn peqataasussaavoq.
Alakkarneqarsinnaavoq nittartagaq www-burningpana.dk, Danmarkimi silaannaap pissusaanut qanoq iliuuseqarniarfiit ilagisaat. Burning Panda WWF Verdensnaturfonden-ipt TrygFonden-illu suleqatigiinnersigut pilersinne qarsimavoq 2009-imi silaannaap pissusai pillugit Københavnini ataatsimeersuarnissap tungaanut ingerlasussaalluni.