EU-p inerteqquteqarniarnera inatsisilerittut akerlilerpai
Puisip amiinik tunisassianik Europamut eqqusseqqusinnginnissamik suliniut nunat tamalaat niuernermik maleruaqqusaanik unioqqutitsinerusoq, EU-mi inatsisilerituut naliliipput.
EU-mi nunat GATT-mik taallugu niuernermi isumaqatigiissusiaminnik unioqqutitsissapput, puisip amiinik tunisassianik eqqussinngilluinnarnissaq niueqateqannginnissarlu eqqutissagunikku, taama naliliipput EU-p nammineq inatsisiliornermut siunnersortai, knr.gl allappoq.
EU-mi niueqatigiinnermut tunngatillugu aalajangiisartut inatsisilerituunit siunnersoqqusimapput, maannalu siunnersortit nalunaarusiaasa takutippaat puisip amiinik eqqusseqqusiunnaartoqassappat tamanna EU-p inatsisiliareriigaanik unioqqutitsinerussasoq.
Naggueqatigut sinnerlugit Inuit Tapiriit Kanatamip præsidentiat Mary Simon tusagaq nuannaarutigalugu radioavisimut oqaatigaa.
- Inatsisiliornermi siunnersortit naliliinerat assut nuannaraarput, erseqqeqaaq paatsuugassaananilu. Naggueqatigiit inuit EU-mut ataqqinnittuupput taamaammallu aamma Europami nunani eqqisseqatigiinnissamik suleqatiginnikkumasumillu pissuseqalerniarneq ataqqivarput.
- Aamma tatigaarput EU Europamilu innuttaasut EU-p nammineq inatsisiliaanik, nunarsuarmi inatsisaasunik niuernermilu isumaqatigiissutinik malinnissasut, Mary Simon oqarpoq.
ICC Canadami præsidentiusoq Duane Smith EU-mit tusagaq pillugu naammagisimaarinnippoq, oqarluni inatsisilerituut naliligaannik EU-p inerteqquteqalerniarneranut akerliliisumik - pingaaruteqartumik erseqqilluinnartumillu - Canadami oqartussat sakkussaqalersut.