Kalaallit Nunaanni pilersaarusiortartut naaperngaarnerat
Namminersornerullutik Oqartussani kommuninilu pilersaarusiortut 25. - 27. marts siullerpaamik Pilersaarusiortut Ulluini taallugu naapeqatigiipput.
Sanaartugassanik pilersaarusiornermut akisussaaffiup ukiut 28-it matumuna siornatigut tiguneqarneranili pilersaarusiortut akornanni aatsaat siullerpaamik naapeqatigiittoqarpoq. 1. januar 2009 kommunit kattussorneri pilersaaru¬siornermullu inatsisit nutaat atuutilersut tamatumani tunuliaqutaapput.
Namminersornerullutik Oqartussat kommunillu pilersaarusiorneq pillugu nutaamik inatsisiseqalerneratigut siunissami suleqatigiinnikkut anguniagaqatigiissinnaanerat peqataasunit pingaarnernut ilaatillugu oqaluuserineqarpoq.
Namminersornerullutik Oqartussani sanaartugassanik pilersaarusiornissamut nunap immikkoortuini soqutigisat nalunaarsorneqassapput, kommunikkaartumillu illoqarfinnut, nunaqarfinnut asimilu nunamut pilersaarutit kommunit namminneq suliarisussaavaat.
Tamatumani kommunini pilersaarusiornerup nunalu tamakkerlugu pilersaarusiornerup pitsaanerusumik ataqatigiissaarnissaat siunertaavoq.
- Suleqatigiikkuutaarluta oqallinnitsinni pilersaarusiornermi periaasissat oqaluuserivagut, paasivarpullu kommunimiit kommunimut suliassarput assigiinngiiaartorujussuarmik ingerlattussaallugu, Pilersaarusiortut Ulluini peqataasut 40-uusut arlaat oqarpoq.
Kommunit sisamat Namminersornerullutik Oqartussat peqatigalugit siunissami isummaminnik misilittakkaminnillu paarlaateqatigiittarnissaat anguniarlugu pilersaarusiortullu akornanni ataqatigiissaarinissaq siunertaralugu piffissaq iluatsillugu suleqatigiissitaliortoqarpoq.
Kalaallit Nunaanni sanaartugassanik pilersaarusiornermik suliaqartut ukiumoortumik Pilersaarusiortut Ulluini isumasioqatigiinnissaq siunertaralugu katersuuttalernissaat siunniunneqarpoq.