Peqqinnissaqarfiit agguataarniarlerput

Nunap immikkoortortaqarfiisa tallimat angisuut Peqqinnissaqarfiup siunissamik aaqqissuussaanissaanni qitiussapput. Qangali isumassarsiaq kiisamik immaqa pivisusunngoraluttualerpoq.

Assi: Jørgen Chemnitz

Peqqinnissaqarfiup aqutsisuisa ataatsimeersuarneranni ulloq siulleq ilaatigut sulisunik suliffimmiiginnartitsiniartarneq nunallu immikkoortortaanut agguataarilissaq salliutinneqarput.

Peqqinnissaqarfinnik aqutsisut aaqqissuussaanermut nutaamut siunnersuutaat nunap immikkoortuinut distriktinut agguataarsimanerit immikkoortortaqarfinnut regioninut angisuunut tallimanngortinneqarnissaat oqallisigineqarpoq.Regionit nutaat kommunerujussuarnut malinnaassapput, saniatigut avannaata kommunerujussuani immikkoortunut marlunnut avinneqassaaq, Aasiaat Ilulissallu regionimi napparsimmaveqarfissuanngussallutik.

regioninut agguataarinissami siunertaavoq sulisuussarsiortarnerup qulakkeerneqarnissaa, suliassaqarfiit akimorlugit suliassaqarfitsigut ataatsimoortitsineq, aningaasartuutikillisaaneq aammalu peqqinnissaqarfimmik atorluaanerulernissaq.

- Ullumikkut napparsimmavinnut mikisunut immikkut ilinniarsimasunik sulisussarsiorneq ajornakusoortoq taamatut nutaamik regionikkaartumik aaqqissuussinikkut immikkut ilinniarsimasut pigeriikkavut pitsaanerusumik atorluarnerulersinnaassavagut. Aamma sulisussanik pissarsiniartarnerit ajornannginnerulissaapput, regionit ataasiakkaat suliassaqarfitsigut ataatsimooqatigiinnernik annertunerusumik pilersitsissammata," pisortaaneq Ann B. Kjeldsen oqarpoq.

Regioninut ikaarsaariarnerup sulisunut napparsimasunullu naleqqunnerpaamik ingerlanneqarnissaa qularnaariarlugu peqqinnissaqarfinni aqutsisut siunnersuutigaat, aallaqqaammut regionit marluk misileraaffigalugit aallarnersaataasumik suliniutit ingerlanneqarnissaat.

Aalajangiusimanninneq

Napparsimmaviit mikisut ilaanni taartaagallartussatut sulisussanik sulisussarsiortarneq assu unamminartuusarpoq, taamaattumik aalajangersimasunik sulisussanik atorfinitsitsinissaq pillugu oqallinneq ajortorsiummik annertunngitsumik oqallinneruvoq.

Sumiiffinni allani ingerlatsivinnilu allani ajornartorsiut annikinneruvoq. Assersuutigalugu kigutit nakorsaat eqqarsaatigalugit sulisunik vikarbureau-neersunik atorfeqartoqanngitsoq, taamatuttaaq juumuunut tunngatillugu sulisussanik pissarsisoqartarpoq.

Taamaattoq iluatsilluartumik sulisussarsiorneq nukippassuarnik atuifiusarpoq - assersuutigalugu juumuut pisortaata Gunvor Perssonip suliffimmi sulinermi affaata missaa juumuunik sulisussarsiornermut atortarpaa.

- Sulisunik suliffimmiiginnartitsiniartarneq ilanngunneqartinnagu sulisussarsiortarneq oqaluuserisinnaanngilarput. Suliffimmiiginnartitsiniartarneq tassaaginnanngillat aaqqiissutit angisuut akisuullu, taamaattumik napparsimmaviit peqqinnissaqarfiillu misilittakkaminnik suliniutiminnillu imminnut isummersorfigeqatigiissinnaapput, taamak aqutsisut ataatsimeersuarnerannit matoqqasumik ingerlanneqartumit - aamma tusagassiorfinnut - tusagassiorfinnut nalunaarummi oqaatigineqarpoq.

Aasiaat napparsimmavianni aqutisut sulisullu assersuutigalugu sulinermi avatangiisit pitsaanerulersinniarlugit siunnerfeqarluartumik suliniutigisimavaat, ilaatigut suliatigut imminnut akuerinnillunilu nersualaarinnittarnikkut, suleqatigiinnerup tarninganik pilersitsinikkut aammalu aqutsisut takussaanerulernerisigut, kiisalu qaammatikkaartumik nukissanik immersorfiusinnaasunik pilersitsinikkut.

2009 - 2012-imut peqqinnissaqarfimmi nukiit ingerlatsivinnut sisamanut eqiterunneqassapput: Sulisussarsiorneq suliffimmiiginnartitsiniartarnerlu, nakorsaaneq angusaqarluarnerunissarlu, IT aammaingerlatseriaatsit kiisalu aaqqissuussineq siammarsaanerlu.

Powered by Labrador CMS