Skip to main content

Tipersuaq

Ilulissani anartarfiit kuuffii pisoqqat pissutigalugit imeq igitaq annertooq umiarsualiviup imartaanut siaruaappoq.

Ilulissani bulldozerit ipertuumik saliisussanngorput imeq igitaq annertooq umiarsualiviup eqqaanut siaruaammat. Imaq ipilik sikuvoq, tamatumalu annertunerpaartaa kingusinnerusukkut bulldozerinit piaarneqarpoq.

Sunngiffimmini assiliisartoq Bent Petersen tuaviinnaq tassannga qimaguppoq marlunngornermi ullup qeqqata siornatigut sermitsiaq.gl -imut assileereerluni asu tamanna tipingaarmat.

– Tassa anartarfiit kuuffii pisoqalisut pisuupput, Qaasuitsup kommuneani teknikkimut direktøriugallartoq Jan Erik Andersen sermitsiaq.gl -imut nassuiaavoq.

– Pilersaarutaagaluarpoq aasamut amerlanerpaartaat taarsersorneqassasut. Massakkut iluarsartuussigallartariaqarpugut neriullutalu aasamut atasinnaassasut.

Illoqarfiup qeqqani anartarfiit kuuffiisa atasinnaajunnaarnerannut pissutaavoq Ilulissat kujammut alliartorujussuarsimanerat.

- Tamanna isumaqarpoq anartarfiit kuuffii pisoqaareersut atorneqartarnerat tallimariaammik annertunerulersimammat, Jan Erik Andersen oqarpoq.

Royal Greenlandip suliffissua aamma umiarsualivimmiippoq. Kisianni erngup igitap tunisassiorneq eqqornavianngilaa.

– Qujanartumik imeq igitaq tunisassiorfiup betonitaatigut isaasimanngilaq. Qanoq pisoqarnissaa malinnaavigilluarparput kommunilu qinnuigaarput imeq igitaq qerrunnikoq piaarnerpaamik piiaqqullugu. Tamannalu malinneqarpoq. Tunisassiornerput taamaattumik eqqorneqassanngilaq, Ilulissani suliffissuup pisortaa Niels Ole Møller sermitsiaq.gl -imut oqarpoq.

50 millioner koruuninik akeqarpoq

Anartarfiit kuuffii pisoqalisut ajornartorsiutaanerat kommunimi teknikkeqarnermut ataatsimiititaliamut ataasinngormat saqqummiunneqarpoq.

– Kuuffiit annertunerpaartaat taarsersorneqarnissaat pisariaqarpoq. Tamarmik taarsersorneqassappata 50 millioner koruuninik tikillugit tamanna akeqassaaq, teknikkeqarnermut ataatsimiititaliami siulittaasoq Bernhard Olsen ataasinngormat Qanoruumut oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER