DIH-mi ataatsimiinneq kingulleq
Dronning Ingridip Napparsimmavissuani qaammat kingulleq alassassimaartoqareersqo, sapaatip akunnikkaartumik ataatsimiittaqattaartoqareersoq sulisullu akerliussutsimik takutsisereersut sulisut maannakkut eqqissikannerput.
DIH-mi sulisut ataatsimiittarnitik qaammatip ataatsip ingerlanerani marlunngornerit tamaasa ingerlattarsimasatik unitsikkallarniarlugit aalajangersimapput.
– Sulisuusugut ilaqutariinnermut peqqissutsimullu naalakkersuisumik Naja Petersenimik oqaloqateqartalernerput naammagisimaarparput. aammalu aqutsisut sulisussaaleqinermik ajornartorsiutip qanoq iliuuseqarniarnerat naammagigallarlutigu, nakorsaaneq Knud ERik Kleist sermitsiaq.gl-imut oqarpoq, nangillunilu:
– Maanna pissutsit qanoq ajortiginerat tamanut paasinarsivoq.
DIH-mi sulisut akornanni eqqisisimajunnaarneq qaammatip ataatsip matuma siornagut aallartippoq, nakorsaanerup Knud Kleistip taamanikkut "tassanngaannaq ataatsimiinneq"-mi taasaatigut. Tamatumunngalu peqqutaavoq peqqissaasunik assorujussuaq amigaateqarneq, tamatumalu kingunerisaanik napparsimmavimmi uninngasunut inissarititaasut amerlassut matusariaqarsimapput, peqatigitillugulu napparsimasunik piaarnerpaamik nakorsartariqanngitsunik tigooraaneq unitsinneqarluni.
Tamatuma kingorna ataatsimiinnerit tallimat ingerlannneqarput, napparsimmavimmi sulisoqatigiikkuutaanit tamanit peqataaffigineqartarluni 100-t sinnerlugit ataatsimeeqataasarsimallutik. Toqqissisimannginneq sapaatip akunnerata siuliani pinerpaaffimminiippoq, akerliussutsimik takutitsisut 200-t naalakkersuisup Naja Petersenip Atassummeersup akerliussutsimik takutitsinermi oqalugiarnerata nalaani tunullugu ingerlarrammata.
– Sulisoqatigiinni qaammat ataaseq qaangiuppat ataatsimeeqqissaagut, taamaalilluta susoqarneranik malinnaatinneqassagatta, Knud Erik Kleist oqarpoq.