Irena Arctica iluarsaateqqinneqassaaq
Umiarsuaq Aalborgimi iluarsaateqqinneqassaaq misissorneqarlunilu.
Tallimanngormat ualikkut Irena Arctica Aalborgimut tikippoq Nuummit sapaatit akunnera ataaseq ingerlaareerluni. Ullut 14-it matuma siorna umiarsuaq siumigut putuvoq, taamanikkullu RAL-imi isumaqaraluarput Nuummi iluarsaativinneqarsinnaassasoq, kisianni iluarsaanneqarnera utaqqiisaagallaannarpoq.
– Nuummi amutsiviup sisak atugaa akuerineqanngilaq, taamaattumik umiarsuaq amutsivimmeeqqittariaqarpoq RAL-imi ingerlatsinermut pisortaq Jens Boye sermitsiaq.gl-imut oqarpoq.
Iluarsaasseqqinnerit sapaatit akunneranik ataatsimik sivisussuseqassapput, kisianni tamanna Kalaallit Nunaannut tassanngaannillu assartuinernik kinguaattoornermik kinguneqassanngilaq.
Jens Boye ilisimatitsivoq ajutoornermut tunngatillugu pisortatigoortumik misissuisoqassanngitsoq, Irena umiarsualivimmut talilertilluni apormat siumigullu angisuumik putulluni.