Issersuup ataani

Rekordileeriartoq: Vindsurfertartup John Petersenip Nuup Kangerlua surferumminik tingerlaatilimmik marlunngornermi marsip 3-anni ikaarpaa, issisiut minus 15-imiittoq.

John Petersen marlunngornermi marsip 3-ani rekordiliiniartoq. Assi: Leiff Josefsen

50-inik ukiullip John Petersenip vindsurferimik issittumi tissiarnera rekordiliissutaanersoq suli uppernarsarneqanngilaq.

– Internetimi ujaasisimagaluarpugut, kisianni inummik issittumi vindsurfererluni ingerlaarsimasumik naammattuuinngilagut, John Petersen sermitsiaq.gl-imut oqarpoq.

Johnip Nuuk Kangerlua vindsurferiminik marlunngornermi ikaarpaa kingornalu Nuutoqqami sissiukkamut aallartiffimminut uterluni. Arlallit eqqarsarsimassapput; Qujanaqaaq taamak issitsigisumi uanga ikaariassannginnama.

– Ajorpallaalaanngilaq, John Petersen ukiut 30-it matuma siornagut vindsurferertaleqqaarnini malunnartinniarlugu rekordileeriartoq oqarpoq.

– Masannaveeqqutinik atorpunga, taakku imaanut pigaanni kissattarput. Kisianni kiinnamut assannullu nilleqaaq. Aaqqateqaraluarpunga, kisianni aaqqatikka ammatilaartariaqarsimavakka najummilluarsinnaaneruniassagama. Tikikka illuttut ilaanni misigisaarukkaluarput. Taamaammat imaanut aqqartariaqarsimavunga, imaanut aqqarama kissannerulaarlunga, John Petersen oqarpoq.

Ikaarneq uternerlu katillugu halv tiimi sinneqalaarpoq, rekordiliinersorli suli uppernarsarneqanngilaq.

– Rekordiliisimanngukkuma issinneruleqqippat nutaamik misileeqqissaanga, John Petersen oqarpoq.

Rekordiliiniarnermit assit takusinnaavatit uani.

Powered by Labrador CMS