Takornariartitsinermi takornariagassanik ineriartortitsineq pitsanngorsarneqassaaq
Aningaasarsiornikkut ajornartoorneq amerikarmiut akinik aamma angalanerminni ornitassaannut annertuumik sunniuteqarpoq, kisianni Kalaallit Nunaat assut ornigineqarpoq, angalatitsisartut kalaallit 'over there'-mit oqaluttuarput.
Travel Learning Conference ukiumoortumik ingerlanneqartartoq, amerikamilu universitettini peqatigiiffinneersunik 300 - 400 peqataaffigineqartartoq, New Orlensimi USA-mi ingerlanneqaqqammerpoq.
Isumasioqatigiinnermi ullunik pingasunik sivisussuseqartumi universitettini peqatigiiffinneersut taakku nunarsuaq tamakkerlugu angalavigisinnaasaannik 50-t sinneqartunik saqqummiussivigineqarput, uterunillu tamakku ilaasortaminnut tikeraagassatut neqeroorutigisinnaavaat.
Kalaallit Nunaannit peqataapput Kalaallit Nunaanni Takornariartitsinermut Inuussutissarsiutinullu Siunnersuisooqatigiit aamma Destination Avannaa, taakku danskit angalatitsinermik aaqqissuussisartoq Arctic Adventure peqatigalugu isumasioqatigiinnermi amerlasuunik pingaarutilinnik attaveqarfeqarlerput.
Aaqqissuussineq aammattaaq ornitassaneersut amerlasuut akornanni attaveqaqatigiinnertut ingerlanneqarpoq, taamaalilluni peqataaneq marloriaammik pissarsiaqarfiuvoq, Klaus Berg Destination Avannaa, oqaluttuarpoq.
- Isumasioqatigiinnermi, ukiut tamaasa ingerlanneqartartumi, peqataasut amerlassusiat allanngorsimanngilaq kisianni angalanernik tunisisinnaanermik naatsorsuutiginninneq siornatigornit annikinneruvoq. Umiarsuaatileqatigiinnut umiarsuarnik takornariartitsinermik ingerlatsisartunut ajornerpaatut isikkoqarpoq, tamakku siornatigumut sanilliullugu akikinnerusumik tuniniaapput, kisianni suli tunisassamittut kissaatigisatik aamma naatsorsuutigisatik suli angunngilaat.
Angalanerit amerlasuut suli tunineqartarput, kisianni inuit angalanerminni suna pissarsiarissanerlugu pingaarnerutinnerulersimavaat.
- Kalaallit Nunaat angalanermi ornigassatut suli soqutigineqarpoq, kisianni misigisassanut piumasaqaatigineqartut allanngorsimanerinut malinnaalluta naammassinninniassagutta, taava aammattaaq angalanerni neqeroorutigisinnaasariaqarpavut soorlu makku ujarassiornernut tunngasut, sermersiornermut tunngasut il. il.
- Amerikami tusagassiorfitsigut saqqummiuteqqammerneqarpoq inuit angalasarnerat pillugu misissuineq tassanilu takutinneqarpoq 10 %-imik appariartoqarsimanera. Angalatitsinernik tuniniaasartut agentit arlallit oqaloqatigisavut, oqarput Kalaallit Nunaat pillugu apeqquteqartut amerlanerusut, tamatumalu Kalaallit Nunaannut takornariartitsinermut attuumassuteqartunut tamaasa akisussaaffeqartilerpai. Takornariagassat amerlillugit ineriartortitsinissamut piumasaqaatit annertusingaatsiarput, tamakkulu siunissami angalanermi ornitassatut kissaatigisanut ilanngutissagutsigit, taava tamatumunnga tunngatillugu iliuusissavut annertusisariaqarpavut, Klaus Berg oqarpoq.