Skip to main content

Kalerriut: Meeqqat utaqqisinnaajunnaarput

Meeqqat Inuunerissut aamma Red Barnetip Nuummi immikkoortortaqarfiata inuuniarnikkut ajornartorsiutit annertuut aaqqinniarlugit pilertortumik siunnerfeqarluartumillu iiuuseqartoqarnissaa ujartorpaat. Taamaaliorput nalunaarusiakkut namminersornerusut FN-imut nalunaarutaannut tapertaliussakkut.

Peqatigiiffiit takku marluk ilassutissatut nalunaarusiartik naammasseqqammerpaat, Naalakkersuisut pisortatigoortumik FN-ip meeqqat pillugit ataatsimiitsitaliaanut nalunaarusiaanut sanilliussassatut taallugu nalunaarusiaq.

Peqatigiiffiit taakku marluullutik inerniliuppaat pisortatigoortumik nalunaarusiaq Kalaallit Nunaanni meeqqat atugaannik eqqortumik takutitsinngitsoq. Assersuutigalugu Kalaallit Nunaanni meeqqat pillugit misissuinerit pioreersut ilaminiinnanngui ilanngunneqarput.

- Isumaqarpugut pisortatigoortumik nalunaarusiaq Kalaallit Nunaanni meeqqat inuuniarnikkut atugaat pillugit misisuinerpassuit siorna saqqummersinneqartut naammattumik tigusiffigineqartarsimanngitsut. Suliniutit qanoq ittut aallartinnissaannut aalajangernissamut ilisimasat tamakkku atorfissaqartippagut, Line Frederiksen oqarpoq.

MI/BB aamma Red Barnetip nalunaarusiaat ullumikkut saqqummiunneqassapput, maanilu oqaatsit marluk atorlugit talerpiatungaatigut downladerneqarsinnaallutik.

Peqatigiiffiit taakku marluk nalunaarusiaasa ajornartorsiutit takussaasunngorttillugillu ajornartorsiutinut aaqqiissutissanik siunnersuutitaqarput.

- Kalaallit Nunaanni meeqqat inuuniarnikkut atugaat politikkikkut aningaasaqarnikkullu pingaarnerpaatittariaqarput. Meeqqani pitsuussuseq,ulloq unnuarlu paaqqinnittarfiusuni inissaaleqinerit, kinguaassiutitigut atornerluinerit, imigassamik aalakoornartulimmik ajornartorsiutit, perorsaasunik, ilinniartitsisunik psykologinillu amigaateqarneq taakkuupput nalunarusiami suliniuteqarfifgisassatut salliutitassanut ilaasut. Ataqatigiissaakkamik suliniutit maannakkut aallartinneqanngippata meeqqat inuusuttullu amerlanerusut katataatinneqassapput, MI/BB-mi siulittaasoq Line Frederiksen oqarpoq.

Piaartumik ikiuineq meeqqanullu politikki

Peqatigiiffiit isumaqatigiissutigaat kalaallit meerartaasa inuuniarnikkut atugarisaannik pitsanngorsaaniarluni sulineq kalaallit nunaanni innuttaasut tamarmiusut kivinniagassatut akisussaaffigaat. Kalaallit Nunaanni Namminersornerullutik Oqartussani, Kommunini, peqatigiiffinni, immikkut sullissisuni, sulisartut peqatigiiffiini namminersortumillu inuussutissarsiuteqartuni allanilu pimoorussillutik sulerusuttuni nukiit pitsaasut tamarmik ataatsimoorlutik inuuniarnikkut akisussaaffimmik tigusisariaqarput ajornartorsiutillu aaqqinniarlugit suleqatigiillutik. Pineqarput katsorsaaneq, pitsaaliuineq ineriartortitsinerlu.

- Isumaqarpugut nalunaarusiaq tamakkuninnga sulisunit, atorfilittanit politikerinillu tigussaasunik suliniuteqarnissamut taamatut sulinissamut atorneqarsinnaasoq. Qaffasissutsini marlunni iliuuseqartoqartariaqarpoq. Maannakkorpiaq meeqqanut sumiginnakkanut ilaqutariinnullu oqimaatsorsiortunut pinasuartumik ikiorsiisoqartariaqarpoq. Aamma piffissamut sivisuumut anguniagassaqartumik meeqqanut ilaqutariinnullu politikkimik suliaqartoqartariaqarpoq, Kirsten Ørgaard Red Barnetip Nuummi immikkoortortaqarfiani siulittaasup tullia oqarpoq.

Ajornartorsiorfiusoq annertooq alla tassaavoq meeqqanik sullissinissamut ilinniarsimasunik amigaateqarneq. Meeqqanik inuusuttunillu ingerlatsivinnik ineriartortitsinissami inuit tamakkuninnga ilinniarsimasunik amerlanerusunik piumasaqaatitaqarpoq, ajornartorsiutaasinnaasunik ilisarinnissinnaasunik aammalu meeqqat inuusuttullu pitsaasumik ineriartornissaannut illiniliuussisinnaasut. Peqatigiiffiit marluullutik isumaqarput meeqqanik inuusuttunillu sullissinermut ilinniarsimasut pioreersut ilinniarteqqinnissaannut qaffassarnissaannullu periusissaq aammalu sulisussanik ilinniarsimasunik sulisussarsiortarnermi periusissaq iliuusissatut pilersaarummi pingaarnerpaanut ilaatittariaqartut.

Sanilliussassatut nalunaarut Meeqqanut Inuusuttunullu suliniaqatigiiffimmut Nanubørn-imut, Tasiorta-mut aamma Foreningen af Grønlandske Børn-imut tusarniaassutigineqarsimavoq, taakkulu tamarmik nalunaarusiaq taperserpaat. Aamma tapersersuivoq IMAK, ilinniartitsisut kattuffiat, nalunaarusiap naggataagut inerniliussaanik tapersiisoq.

PIVIUSUT:

Danskit naalakkersuisui FN-ip meeqqat pillugit ataatsimiitsitaliaanut ukiut tamaasa nalunaarusiortarput, Meeqqat piginnaatitaafffiat naalagaaffeqatigiiffimmi tamarmiusumi qanoq eqqortinneqarnersoq pillugu.

Nalunaarusiami Kalaallit Nunaannut tunngasortaa kalaallit nunaanni oqartussaasunit suliarineqartarpoq. Taamaalioreeraangata NGO-nik taaneqartartut - tassa peqatigiiffiit pisortanit ingerlanneqanngitsut - pisortat nalunaarusiaat oqaaseqarfigisinnaavaat. Oqaaseqaatit sanilliussassatut nalunaarummi (skyggerapport) eqikkarneqartarput, tassalu taamaattoq MI/BB-p aamma Red Barnetip Nuummi immikkoortortaqarfiata suliarisimavaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER