Ulloq arnat sorsuffiat

FN-ip arnat sorsuffiattut ullorititaa 8. marts nunarpassuarni malunnartinniarneqassaaq. Nuummi Inuit Ataqatigiit ulloq malunnartinniarlugu arnanik persuttaasarneq oqallisigitinniarpaat.

Nuummi 8.marts 2007. Assi: Leiff Josefsen

Arnanik persuttaasarneq. Taamatut qulequtaqarpoq Inuit Ataqatigiit nunarsuatsinni arnat ullormi sorsuffianni sapaammi 8. marts kulturimut illorsuarmi Katuami oqallitsitsinissamut qaaqqusissutaanni.

- Taamatut qulequtaqartipparput pissutigalugu Kalaallit Nunaanni persuttaasarneq annertuumik atorneqarmat. FN-ip nalunaarusiaani nutaami tikkuaasoqarpoq Kalaallit Nunaat nunarsuarmi persuttaaffiunerpaat ilagigaat, taamaattumik tamanna qulequtaritillugu oqallisiginiarparput Nunatsinni arnanut persuttaasarneq sooq annertusiartornersoq qanorlu ajornartorsiut tamanna qaangerneqarsinnaanersoq, aaqqissueqataasut ilaat, inatsisartunut ilaasortaq, Olga P. Berthelsen oqarpoq.

- Angutininngarnit arnat amerlanerusut ilinniagaqartarput, arnallu amerligaluttuinnartut atorfikkaanngortarput. Angutit kinguarsimaqaat, taamaattumik apeqqutinngortissimavarput tamanna pissutaanersoq Nunatsinni arnanut persuttaasarnerup annertusigaluttuinnarneranut, Olga P. Berthelsen oqarpoq, taassumalu aamma kissaatigaa angutit oqallinnermi peqataanissaat. Saqqummiisunut ilaavoq isiginnaartitsisartoq Makka Kleist, perorsaaneq pillugu oqalugiartussaq.

- Nukappiaqqanik perorsaariaaseq pissutigalugu angutit ullumikkut ajornartorsiuteqarnersut oqallisigitinniarparput. Oqallisissaq mianernartuuvoq, kisianni nukappiaqqat qujagisaavallaarpat perorsarneqarnerannilu akisussaaffiligaanngippallaarpat, Olga P. Berthelsen aperaaq.

Naligiissitaanermut ataatsimiititaliap siulittaasua Poul Hansen naligiissitaanermut ataatsimiititaliap suliai pillugit saqqummiissaaq, soorlu aamma 8. marts-suleqatigiit saqqummiiumaartut.

Ulloq taanna Sisimiuni kulturcenterimi Taseralimmi malunnartinniarneqassaaq oqalugiarnernik, erinarsornernik arnallu suliaannik saqqummersitsinermik.

Arnat Ulluat pillugu paasissutissat Sermitsiami atuakkit....

Powered by Labrador CMS