Skip to main content

Qallunaat ilisimasassarsiortut

Aqqartartut neriupput umiarsuup nunatsinnuliartaatip umiuneraniilli ukiut 50-it qaangiuttullu umiarsuakorsuup ujarnissaanut aningaasanik pissarsissallutik

Aasarpat qallunaat ilisimasassarsiortut immamut Nunap Isuata kujataanut angalaniarput nunatsinnuliartaat umiarsuaq "M/S Hans Hedtoft" ukiut 50-it matuma siornatigut angalaqqaarnermini 30. januar 1959 umiusoq ujarniarlugu. Taama allaaserisaqarpoq Kristeligt Dagblad.

"Hans Hedtoft Ekspeditionen" ukiuni arlalinni piareersarneqarpoq sumiissusersiortmit ingeniøriusumillu Claude Enochimit aamma qallunaanit aqqartartunit No Limits Divingimit, maannakkumulli ilisimasassarsiornissap tamatuma akissaa aningaasat 2 mio koruunit missaanniittut pissarsiarisinnaasimanngilaat. Maannakkut qallunaat ilisimasassarsiortut naatsorsuutigilerpaat umiunerup ukiunik 50-inngornerannik malunnartitsiniaaneq aningaasaleerusuttunik nalunaartoqarnissaanut iluaqutaassasoq.

- Maanna aningaasaliisoqarnissaanut isumaqatiginninniarpugut. Tamanna iluatsissappat 15. julimiit 15. augustip tungaanut "Hans Hedtoft"-ip umiuffigisaatut ilimanarnerpaaq imaq misissuiffigisinnaalissavarput, Claude Enoch oqaluttuarpoq.

Umiarsuakup immap naqqani 1700 meterisut itigisumiissammat aqqartartut taama ititigisumut aqqarsinnaanngilluinnarput, kisianni neriuutigineqarpoq sumiinnerata paasineqarnissaa robot-inillu immamut aqqartartunik assiliissutitalersukkanik assiliiartortitsisoqassalluni.

Claude Enoch isumaqarpoq "Hans Hedtoft" umiusoq sananeqarnermini ajoquteqarami neriupporlu assiliinerit tamatuminnga takutitsisinnaajumaartut taamaattoqarsimassappat.

- Umiarsuup saneraasa assilineqarnissaat kissaatigisorujussuuara, taakkunatigut takuneqarsinnaassammat iluliarsuarmut aporsimanersoq, imaluunniit svejsernerisa katagarsimanerat takuneqarsinnaassanersoq.

Claude Enochip ilanngullugu oqaatigaa aamma sumiissusersinissaanut patsisaaqataalluinnarmata containerinik peqarmat "Kalaallit Nunaata oqaluttuassartaanik 16 tonsinik imalinnik", oqaluffimmi atuagarsuit inuit allattorsimaffiinik, kuisinnermut allagartanik aamma assingusunik toqqortanik. Kalaallit Nunaata toqqortaataasa pingajorarterutaat "Hans Hedtoft"-imut kiveqataapput. No Limits Diving suli peqanngilaq containerit qaqinneqarnissaannut atortorissaarutinik, taamaattumik taamaaliussagunik ilisimasassarsioqqittariaqarput.

"Hans Hedtoft"-ip suli nassaarineqannginneranut Claude Enochip qularutiginngilluinnarlugu patsisaasoraa qallunaat pisortaasa imaluunniit Grønlandsfondenip kissaatiginngimmassuk umiarsuakorsuup nassaarineqarnissaa. Kukkusumik sananeqarsimanera pissutigalugu umiusimanera uppernarsineqarpat taava ilaasunit ajunaartunit 95-iusunit qimagaasut annikitsumik taarsiiffigineqarnerminnit annertunerungaartumik taarsiiffigitinnissaannik tamanna kinguneqarsinnaammat.

No Limits Diving 2004-mi ilisimasassarsiornermut aningaasassarsioraluarpoq iluatsinngitsumik. Piffissami nutaanerusumi tamatuma saniatigut "Hans Hedtoft"-ip sumiinnera paasiniarneqartaraluarpoq ilisimassarsiorluni angallammit "Vædderen"-imit 2006-imi Galathea 3-ilisimasassarsiornermi akunnerit arlaqartut atorlugit ekkolod-imik atortorissaartumik Nunap Isuata kujataani immami paasiniarneqaraluarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER