Kræftimik eqqugaasimasut ernumagai
Neriuffiit Kattuffiat, kræftimut akiuiniarnermut peqatigiiffiit kattuffiata Sanami ajornartorsiornerup kræftimik nappaatillit nakorsarneqarnerannik eqquissanersoq ernummatigaa.
Kalaallit Nunaata napparsimmavissuarni Dronning Ingridip Napparsimmavissuani - Sanami - pissutsit pillugit tusagassiorfitsigut oqallinnerit kingulliit Neriuffiit Kattuffiat kræftimik nappaateqartut sinnerlugit eqqissisimajunnaarsippaat. Minnerunngitsumik nakorsasrtinnissamut neqeroorutitigut kingunerisinnaasai pillugit.
– Taamaattumik assorujussuaq pingaaruteqarpoq ajornartorsiutit aaqqinniarlugit oqartuussaasut suleqatigiissitamik pilersinneqarsimasumik - task forceimik taaneqartumik - suleqateqarlutillu tusaanniarnissaat, suleqatigiissitami ilaasortaasut ulluinnarni sulinerni ajornartorsiutinik aaqqiiniartarnermut ilisimasaqareersuummata, taamak kattuffiup siulittaasua Johanne Olsen siulersuisut sinnerlugit tusagassiorfinnut ammasumik allakkani allappoq.
Johannep peqatigitillugu erseqqissarpaa, piffissaq sivisunerusoq eqqarsaatigalugu sulisut ilinniartinneqarnissaat pisariaqartoq.
– Inuk napparsimalersimasoq kinaluunniit nakorsarneqaranissamut piginnaatitaaffeqarpoq, uagullu erseqqissarusupparput Dronning Ingridip Napparsimmavissuata Kalaallit Nunaanni innuttaasunut pitsaasumik nakorsaalluni ingerlanneqartussaammat, pitsaassutsikkut pitsaasumik napparsimmaviunissaa innuttaasullu tungaanniit tatiginartuunissaa.
Naparsimasut Danmarkimut aallartinneqarnissaat iluaqutaanngilaq, Johanne Olsen nangilluni allappoq:
– Erseqqissassavarput piffissami kingullerpaami piffissaasuaneq peqqutigalugu napparsimasut Danmarkimut aallartinneqartalersimanerat akuersaarneqarsinnaanngimmat. Naluneqangilaq inuit avatangiisini nalunngisaminni toqqissisimasumilu nakorsartittut ajornannginnerusumik peqqissiartulersartut, Neriuffiit Kattuffianni siulittaasoq erseqqissaavoq.