Tasiiilami kommunalbestyrelsip ataatsimiinnissaa taamaatiinnarpoq
Kommuneqarfik Sermersuumi kommunalbestyrelsip ataatsimiinnissaralua Tasiilami februaarip 17-iani ingerlanneqartussaagaluartoq taamaatiinnarlugu Nuummi ingerlanneqartussanngorpoq.
Kommuneqarfik Sermersuumi kommunalbestyrelsimut ilaasortat kommuninilu qullersat Tasiilamut pilersaarutit malillugit ullumi arfinngornermi aallanngitsoornerannut silarlunnera peqqutaavoq. Ataatsimiigiartussat ataasinngorpat aallarnissaminnut periarfissaqarsimagaluarput, kisianni Tasiilamut tikeraarnissamut pilersaarutit kommunalbestyrelsimut piviusunngortikkuminaassissammata aalajangiunneqarpoq, taarsiullugu ataatsimiinneq Nuummi marlunngornermi februaarip 17-iani nal. 10.00 ingerlanneqassasoq.
Borgmesterip qullersaqarfiullu Kangiani tikeraarnissaat pilersaarutit malillugit ingerlanneqaannassaaq. Taakku pingasunngornermi februaarip 18-iani aallassapput, Borgmesteri Asii Chemnitz Narup Ittoqqortoormiinukassalluni qullersaqarfimmilu qullersat Ammassaliup pigisaani angalaassallutik.