Atlantikoq qulaallugu timmisartuussinissaq tallimanngornermut kinguartinneqarpoq
Air Greenlandip ullumi pingasunngornermi 14. januar Københavnimiit Narsarsuarmut uterlugulu timmisartuussinissat kinguartittariaqarpai timmisartup Boeing757-p teknikkikkut ajornartorsiuteqarneranik peqquteqartumik.
Tassunga taarsiullugu tiummisartuussineq tallimanngorpat 16. januar ingerlanneqassaaq, piffissat nalinginnaasut atorlugit.
Timmisartuussinissanut kinguartinneqartunut Nuummut Nuummiillu ilaasussat aqagu sisamanngornermi Kangerlussuakkut timmisartuussinissamut nuunneqarput. Ilaasussallu sinerissami illoqarfinnut allanut ingerlasussat tallimanngornermi immikkut timmisartuussinissamut ilaassapput, Danmarkimiilli Paamiuliartut ajoraluartumik arfininngornermi aatsaat apuutissapput.
Allakkat nassiussallu 3500 kg-t ullumi timmisartumut kinguartinneqartumut ilaasussaagaluit tallimanngorpat immikkut timmisartuussinermi nassarneqassapput.