Kalaallit Nunaat, Nunarsuarmi naalagaaffik pissaanilik nutaaq?

Frankrigimi præsidentimut siunnersortaasimasup siunissami Kalaallit Nunaata qanoq inisisimanissaa eqqoriarpaa.

Asseq: Polfoto

Frankrigimi præsidentimut siunnersortaasimasoq, Jacques Attali, aamma maannakkut præsidentiusumik Nicolas Sarkozymit suleqateqarsimasup, aningaasarsiorneq pillugu saqqummersittakkami L'Expansionimi qaammammi matumani saqqummersumi siunissami nunarsuaq tamakkerlugu aningaasarsiornikkut inissisimasoqarnissaanik eqqoriaavoq, allaaserisami taaguteqartumi »aningaasaatilissuit nutaat ukiuat siulleq«, tassani Kaalaallit Nunaat 2029 aningaasarsiornikkut ingerlatsinermi qitiuvoq.

Attali aallartippoq arsarluni WM-imi ajugaanniutivinneq Kinap aamma Indiap akornanni unammisut oqaluttuaralugu, nunarsuarmiut tamarmik 4. januar 2029 isiginnaaqataapput. Unammineq Nuummi arsaattarfissuarmi ingerlanneqartussaavoq »Kunngitsuuffik Kalaallit Nunaanni illoqarfiit pingaarnersaanni, siornatigut Danmarkimi nunap immikkoortuisa ilaat 2014-imili namminersortunngortoq nunarsuarmilu nunanit pisuunerpaanngorsimasoq uuliaqarluarnerujussua pissutigalugu«.

»Nuummi inuuneq nuanneqaaq, ingammik silaannaap allanngornerata kinguneranik narsaannarsuaqaleqqissimammat, sissarisseqqissimalluni aamma seqinnisaarfiusinnaasumik sissaqaleqqilluni«, siornatigut Frankrigimi præsidentimut siunnersortaasimasoq allappoq. Nangilluni oqarpoq »innuttaasut millioniusut - ukiut 20-t matuma siornatigornit 20-riaammik amerlanerusut - akornanni amerlanerit aningaasaqarnermik ingerlatsisuupput, taakku 2010-mili tikissimapput aningaasaqarnikkullu ajornartorsiornerup kinguneranik Storbritaniap aningaasaqarnermigut ajalusooriaannaasup Euro atulermagu«.

Naggataagut minnerunngitsumillu »nunarsuarmi aningaasaqarneq ingerlariaqqissimavoq Canadap Kalaallit Nunaatalu eqqaanni uuliaqarfinnik nassaarsimanerup kingunerannik«.

Powered by Labrador CMS