Biskoppi silaannaap allanngoriartorneranut akerliuvoq
Sofie Petersen upperisarsioqatigiillu allat 24-t peqatigiillutik silaannaq pillugu oqariartuummik allagaqarput, tassuunakkut nunarsuarmioqatigiit politikeriinut silaannaap allanngoriartornera pimooruteqqullugu qinnuiginnipput.
Biskop Sofie Peterseni avatangiisit pillugit oqallinnermut akuliuppoq. Biskopi radioaviisimut nassuiaavoq, upperisarsioqatigiit siuttui 24-it allat peqatigalugit nammineq silaannaq pillugu oqariartuummik allagaqarsimanerlutik.
- Nunarsuaq inuuffigisarput ataasiinnaavoq, silaannaq najuussugarput ataasiinnaavoq, taamaattumik ajornartorsiutit silaannaarmut tunngasut malugeqqussallugit pisussaaffigaarput. Isummatta Københavnimi 2009-mi decembarimi naalagaaffiit qullersaasa silaannaq pillugu ataatsimeersuarnissaannut apuunnissaat anguniarparput, taamak biskop Sofie Petersen Radioaviisimut oqarpoq.
Upperisarsioqatigiit siuttuisa qinnutimikkut pinngortitamut ataqqinninnissaq kissaatigaat siunissamilu inuk salliutinneqassasoq aammalu nunarsuarmi C02-mik aniatitsineq millisarneqassasoq.