Nunafondimiit 2,5 milliuunit
Qinnuteqartut 40-t aningaasaateqarfimmit taperneqarput, ukiullu tullii marluk 4 milliuuningajaat agguaanneqassapput, aningaasarsiornikkut ajalusoorneqaraluartoq.
NunaFondip siulersuisui ukioq manna pingajussaanik ataatsimiilluni qinnuteqaatit 180-it isummerfigai, taakkunannga 40-t akuersaarlugit. Tapiissutit katillugit 1,8 millioner akuersissutigineqarput, qaavisigut Sisimiuni kulturikkut illorsuaq Taseralik 600.000 koruuninik tunineqarluni. 2008-mi siulersuisut pingasoriarlutik ataatsimiinnerminni katillugit akuersissutigaat 12,7 mio. koruunit sinnilaarlugit.
- Naak ileqquusutut ataatsimiinneq nuannerluinnartumik ingerlanneqaraluartoq ataatsimiinneq qaammatit marlussuit qaangiummatali aningaasaqarniarnikkut ajornartorsiornerup atuutilerneranit malunnaatilittut ingerlanneqarpoq. NunaFondip isertittagai aningaaseriviit sinneqartoorutaannik aallaaveqarput, tamaammat aningaasaateqarfiup akuerisariaqarpaa ukiut tulliusut marlussuit isertitaqarfiussanngitsut. Taamaakkaluartoq aningaasaateqarfik aningaasanik uninngasuuteqarpoq, tamaammat aalajangerluni ukiuni 2008-p sinnerani, 2009-mi aamma 2010-mi ukiumut 1,9 mio. koruunit tikillugit tunniuttarniarlugit, siulittaasoq Kuupik Kleist allappoq.
Ukuni 2009-mi 2010-milu akuersissutinik kinguneqartartunik ukiumut ataasiarluni ataatsimiittoqartassaaq, ataatsimiinnerillu decembarip aallartinnerani pisassapput, taamaammat qinnuteqarnissamut killigititaasoq novembarip aallaqqaataasaasalluni.
- Taamaakkaluartoq siulersuisut aalajangerput qinnuteqaatit immikkut ittut aamma immikkut soqutiginartut takkunneri najoqqutaralugit isummerfigisarniarlugit. Aammattaaq siulersuisut aalajangerput aningaasaqarniarnikkut ajornartorsiuffiup nalaani qinnuteqaatit meeqqanut inuusuttunullu tunngasut pingaarnerutinniarlugit, aammalu qinnuteqaatit inunnut amerlanerpaanut tussinnaasut salliutinniarneqarumaartut.
Siulersuisunut ilaasortaq Kay Dam Steffensen, 1993-miilli siulersuisunut ilaasortaasimasoq 2008-p naanerani tunuassaaq, siulersuisuisa aalangerpaat 2008-p naanissaata tungaanut Kuupik Kleist siulittaasuussasoq, tamatumalu kingorna Jørgen Wæver Johansen siulittaasunngussalluni.
Siulittaasumut tulliuvoq Per Skaaning, siulersuisunilu ilaasortat sinneri tassaallutik Doris Jakobsen aamma Kristian Jeremiassen. Ukiuni aggersuni ataatsimiittarnerit ikilisarneqarneri aallaavigalugit siulersuisut aalajangerputtaaq aningaasaqarniarnikkut ajornartorsiorfiup nalaani siulersuisut ajunngitsorsiaat affaannanngorallassasut.
Aningasanik agguaaffigineqarsimasut talerpiatungaani takuneqarsinnaapput.